ފެންބޮޑުވާ މައްސަލަ ހައްލުކުރަން މަޖީދީމަގުގެ ޓްރެފިކަށް ބަދަލު ގެނެސްފި
މަޖީދީމަގުގައި ފެންބޮޑުވާ މައްސަލަ ހައްލުކުރުމުގެ ގޮތުން ބްލޮކްތަކަކަށް ބަހާލައިގެން ފެށި މަސައްކަތުގައި ފުރަތަމަ ބްލޮކްގެ މަސައްކަތް ހިނގަމުންދާތީ އެ މަގުގެ ޓްރެފިކް ފްލޯއަށް ބަދަލު ގެނެސްފި އެވެ.
މާލެ ސިޓީގެ މަގުތަކުގައި ހަލާކުވެފައިވާ ސަރަހައްދުތައް ދެނެގަތުމަށް ސިޓީ ކައުންސިލުން ކުރި ސާވޭއިން ފާހަގަކުރެވުނު ސަރަހައްދުތައް މަރާމާތުކުރަން ފަށާފައިވާ މަސައްކަތުގެ ދަށުން ހަވީރީ ހިނގުމުގައި ހުރި އެފަދަ ސަރަހައްދުތައް ވަނީ މަރާމާތުކޮށްފަ އެވެ.
އެ މަސައްކަތް ނިންމުމަށް ފަހު މަޖީދީ މަގުގައި އެހެން ހުރި ސަރަހައްދުތައް މަރާމާތު ކުރުމުގެ މަސައްކަތް ފެށީ މިދިޔަ އަންގާރަ ދުވަހު އެވެ. އެ މަސައްކަތުގައި ކައުންސިލުން އެންމެ ބޮޑު އިސްކަމެއް ދީފައި ވަނީ ވާރޭވެހި އެންމެ ބޮޑަށް ފެންބޮޑުވާ ސަރަހައްދުތައް މަރާމާތު ކުރުމަށެވެ.
އެގޮތުން ފުރަތަމަ ފެށީ މަޖީދީމަގާއި ރަށްދެބައި މަގު ގުޅޭ ސަރަހައްދުގެ މަސައްކަތެވެ.
މާލެ ސިޓީ ކައުންސިލުން އިއްޔެކުރި އިއުލާނެއްގައި ބުނީ މަޖީދީމަގު ފެންބޮޑުވާ މައްސަލަ ހައްލު ކުރުމުގެ ގޮތުން ބްލޮކްތަކަށް ބަހާލައިގެން ފުރަތަމަ ބްލޮކްގެ މަސައްކަތް މިހާރު ފަށާފައިވާ ކަމަށެވެ. އެ މަސައްކަތް ހިިނގަމުންދާތީ މާދަމައިން ފެށިގެން އަންނަ ހަފުތާގެ ހޮނިހިރު ދުވަހުގެ ނިޔަލަށް މަޖީދީމަގު، ޗާންދަނީމަގާއި ރަށްދެބައިމަގާއި ހަމައަށް ޓްރެފިކް ފްލޯއަށް ބަދަލު ގެނެސްފައިވާ ކަމަށެވެ.
އެއްގަމު އުޅަނދު ދުއްވާ ފަރާތްތަކުގެ ސަމާލު ކަމަށް އެކަން ގެނައުމުގެ ގޮތުން ޓްރެފިކް ފްލޯއަށް ގެނެވިފައިވާ ބަދަލު އެނގޭނެ ޗާޓެއް އިއުލާނާ އެކު ވަނީ އާންމުކޮށްފަ އެވެ.
މަސައްކަތް ކުރިއަށްދާ ގޮތުގެ މައުލޫމާތު ދެއްވަމުން މާލެ ސިޓީ ކައުންސިލުގެ މޭޔަރު އާދަމް އާޒިމް މިދިޔަ މަހު ވިދާޅުވީ، މަގުތައް ހަލާކުވެފައި ހުންނަ މައްސަލައަކީ ރައްޔިތުންނަށް ވަރަށް ބޮޑަށް ދަތިވެފައިވާ މައްސަލައެއް ކަމަށެވެ. އެހެންކަމުން ވީހާވެސް އަވަހަކަށް އެ މައްސަލައަށް ހައްލު ހޯދުމަށް މަސައްކަތް ކުރަމުންދާ ކަމަށެވެ.
މަގުތައް މަރާމާތުކުރުމުގެ މަސައްކަތް ފެށިގެން ކުރިއަށްދާއިރު، އަމީނީމަގާއި ޗާންދަނީމަގު ފަދަ ބޮޑެތި މަގުތައް މަރާމާތު ކުރުމަށް ހާއްސަ ސަމާލު ކަމެއް ދެއްވާނެ ކަމަށެވެ. އަދި މާލޭގެ ފެންބޮޑުވުމުގެ މައްސަލައަށް ދާއިމީ ހައްލެއް ހޯދުމަށް، ބޭނުންވާ ބޮޑެތި ޕަމްޕުތައް ހޯދުމަށް އޯޑަރުކޮށްފައިވާ ކަމަށް ވެސް މޭޔަރު ވިދާޅުވެފައިވެ އެވެ.
ސިޓީ ކައުންސިލުން ބުނީ މަސައްކަތުގެ ތެރެއިން ދުވާރުމައްޗާއި މަގުގައި ހެދިފައިހުރި ވަޅުގަނޑުތައް މަރާމާތު ކުރުމުގެ އިތުރުން ކާނުތައް ސާފުކުރުމަށް ނިންމާފައިވާ ކަމަށެވެ.
މަސައްކަތް ނިމޭއިރު މަޖީދީމަގުގައި ފެންބޮޑުވުމުގެ ސަބަބުން، ހިނގާ މީހުންނަށާއި ދުއްވާ އުޅަނދުތަކަށް ކުރިމަތިވާ އުނދަގޫތަކާއި ދަތިތަކަށް ހައްލު ލިބޭނެކަމުގެ ޔަގީންކަން ވަނީ ދީފަ އެެވެ.
މާލޭގެ މަގުތައް މަރާމާތުކޮށް، ފެންބޮޑުވުމުގެ މައްސަލަ ހައްލު ކުރުމަށް ކުރާ މަސައްކަތްތަކަކީ ސިޓީ ކައުންސިލުން އިސްނަގައިގެން ކުރުމަށް ރާވާފައިވާ މަސައްކަތްތަކެވެ.
މާލޭގެ މަގުތައް ރަނގަޅު ފެންވަރަށް ހެދުމުގެ މަސައްކަތް ކުރިއަށްދަނީ ޗައިނާ ސަރުކާރުގެ ހިލޭ އެހީގަ އެވެ. ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބު މިދިޔަ އޮގަސްޓު މަހު ވިދާޅުވެފައިވާ ގޮތުގައި މަގުތައް ހެދުމުގައި އެންމެ ބޮޑު އިސްކަމެއް ދޭނީ މާލެއަށް ދިމާވެފައިވާ ފެން ބޮޑުވުމުގެ މައްސަލައަށް ދާއިމީ ހައްލެއް ހޯދުމަށް ކަމުގަ އެވެ.
