އެކޮމޮޑޭޝަން ހަމަޖެއްސި ގޮތް އެންޑީއެމްއޭ އިން ދިފާޢު ކޮށްފި
ކޮވިޑް-19 އާއި ގުޅިގެން އެކޮމޮޑޭޝަން ހަމަޖެއްސި ގޮތް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ދިފާޢު ކޮށްފިއެވެ.
ކޮވިޑާއި ދެކޮޅަށް ފްރަންޓްލައިންގައި މަސައްކަތް ކުރި މުވައްޒަފުން މާލޭ ސަރަހައްދުގެ ގެސްޓް ހައުސްތަކުގައި ބޭތިއްބުމަށާއި، އައިސޮލޭޓު ކުރަން ޖެހޭ މީހުން ދައުލަތުގެ ހަރަދުގައި ރިސޯޓުތަކުގައި ބޭތިއްބުމަށް އަމަލު ކުރި ގޮތް އެންޑީއެމްއޭ އިން މިއަދު ދިފާޢު ކުރަމުން ގެސްޓުހައުސް ތަކުގައި މީހުން ބައިތިއްބަން އުސޫލެއް ކަނޑައެޅި ކަމަށެވެ.
އިއްޔެ އޮޑިޓް އޮފީހުން ނެރުނު އެެންޑީއެމްއޭގެ ކޮވިޑް-19 ކޮމްޕްލަޔަންސް އޮޑިޓުގައި ފާހަގަކުރި އެކޮމަޑޭޝަން ހަމަޖެއްސުމުގައި ހުރި މައްސަލަތައް ދިފާޢު ކުރައްވަމުން އެންޑީއެމްއޭ ގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި އެއޮތޯރިޓީގެ ޗީފް އެގްޒަކެޓިވް ހިސާން ހަސަން ވިދާޅުވީ ގެސްޓް ހައުސްތަކުގައި މީހުން ބޭތިއްބުމުގެ އުސޫލެއް ކަނޑައެޅި ކަމަށާއި އެއުސޫލުގެ ތެރެއިން މީހުން ބައިތިއްބަން ރޭޓުތައްވެސް ވަނީ ކަނޑައަޅާފައި ކަމަށެވެ. އަދި އެކަމަށް އެއްބަސްވެފައިވާ ކަމަށް ވެސް ވިދާޅުވި އެވެ.
އެ އުސޫލުގެ ތެރެއިން، ފުލް ބޯޑް، ޝެއާ ކުރާ ގޮތަށް، އަދި ރޫމް ލޯންޑްރީ ސާވިސްއާ ދުވާލަކަށް ހަމައެކަނި ކޮޓަރި ފަދަ ހިދުމަތްތަކަށް ރޭޓުތައް ވެސް އުސޫލުގެ ތެރެއިން ކަނޑައަޅާފައިވާ ކަމަށް ހިސާން ވިދާޅުވިއެވެ.
