މާލެ ފެނުއަޑީގައި، 24 ގަޑިއިރުގެ ތެރޭގައި 109 މިލިމީޓަރުގެ ވާރޭ ވެހިއްޖެ

މިހާރު ކުރަމުންދާ ވިއްސާރައިގައި ބޯކޮށް ވާރޭވެހި ވެރި ރަށް، މާލޭގެ މަގުތަކުގައި ފެން ބޮޑުވުމާ ގުޅިގެން ފެން ހިންދުމުގެ މަސައްކަތް ފަށައިފި އެވެ.

Ads by MWSC

ރާއްޖޭގެ އެކި ސަރަހައްދުތަކަށް މޫސުން ގޯސްވުމާ ގުޅިގެން މޫސުމާ ބެހޭ ގައުމީ އިދާރާއިން އޮރެންޖް އެލާޓެއް މިއަދު މެންދުރުފަހު ވަނީ ނެރެފަ އެވެ. ބ. އަތޮޅުން ފެށިގެން ތ. އަތޮޅަށް އެލާޓް ނެރެފައި ވަނީ މިރޭ ހަތެއް ޖެހުމާ ހަމައަށެވެ.

އެ ސަރަހައްދަށް ގުގުރުމާ އެކު، ބޯކޮށް ވާރޭވެހި ފެންބޮޑުވާނެ ކަމަށް މެޓް އޮފީހުން ވަނީ ލަފާކޮށްފަ އެވެ.

މެޓް އޮފީހުން ބުނީ ވޭތުވެދިޔަ 24 ގަޑިއިރުގެ ތެރޭގައި މާލެއަށް 109 މިލިމީޓަރުގެ ވާރޭ ވެހިފައިވާ ކަމަށް ރެކޯޑު ކުރެވިފައިވާ ކަަމަށެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނީ ބޯކޮށް ވާރޭވެހި ފެން ބޮޑުވުމާ ގުޅިގެން ފެން ހިންދުމުގެ މަސައްކަތް ފަޔަ އެންޑް ރެސްކިއު ސާވިސްއިން ކުރަމުންދާ ކަމަށެވެ. އެގޮތުން މާލޭގެ ތިން ސަރަހައްދެއްގައި 11 ޕަމްޕު ބަހައްޓައިގެން މަސައްކަތް ކުރަމުން އަންނަ ކަމަށެވެ.

އަދި ބައެއް ގެތަކަށް ފެން ވަންނަމުންދާތީ އެހީތެރިކަން ފޯރުކޮށްދިނުމަށް މާލެ އޭރިއާ ކޮމާންޑުގެ ސިފައިން ހަރަކާތްތެރިވަމުންދާ ކަމަށް ވެސް އެމްއެންޑީއެފުން ބުންޏެވެ.

ދިވެހި ފުލުހުންގެ ހިދުމަތުންނާއި މާލެ ސިޓީ ކައުންސިލުން ވެސް ދަނީ ވިއްސާރައިގައި މާލޭގެ ގޭގެއަށާއި ފިހާރަތަކަށް ފެން ވަނުން ރައްކާތެރި ކުރުމަށް ވެލިބަސްތާ ޖެހުމާއި ފެން ވަދެފައިވާ ގެތަކުން ފެން ހިންދުމުގެ މަސައްކަތުގައި ހަރަކާތްތެރިވަމުންނެވެ.

އެހީތެރިކަން ބޭނުންވާ ފަރާތްތަކުން 911 އަށް ގުޅުމަށް ފުލުހުން ވަނީ އެދިފަ އެވެ.