ފެން ހިނދެންދެން ބަރު އުޅަނދު ނުދުއްވަން އެދިއްޖެ
ރާއްޖެއަށް މިހާރު ކުރަމުންދާ ވިއްސާރައިގައި ބޯކޮށް ވާރޭވެހި ވެރި ރަށް، މާލޭގެ މަގުތަކުގައި ފެންބޮޑުވުމުގެ ސަބަބުން ބަރު އުޅަނދު ނުދުއްވުމަށް ފުލުހުން އިލްތިމާސް ކޮށްފި އެވެ.
މަގުތަކުގައި ބަރު އުޅަނދުތައް ނުދުއްވުމަށް އިލްތިމާސް ކޮށްފައިވަނީ މަގުތަކުން ފެން ހިނދި އާއްމު ހާލަތަށް މަގުތައް އަންނަންދެނެވެ.
ފުލުހުން ބުނީ، މަގުމަތީގައި ފެންބޮޑުވެ، ބައެއް ގޭގެއަށް ފެން ވަނުމުގެ ހާދިސާތައް ހިނގަމުންދާ ކަމަށެވެ. އެހެންވެ އާއްމު ހާލަތަށް މަގުތައް އަންނަންދެން ޒަރޫރީ ބޭނުންތަކުގައި ނޫންގޮތަކަށް ހަތަރު ފުރޮޅުލީ އުޅަނދުތައް ވެސް ނުދުއްވުމަށް ފުލުހުން އިލްތިމާސް ކޮށްފައިވެ އެވެ.
ފުލުހުން އެހެން އިލްތިމާސް ކޮށްފައިވާއިރު، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނީ ބޯކޮށް ވާރޭވެހި ފެން ބޮޑުވުމާ ގުޅިގެން ފެން ހިންދުމުގެ މަސައްކަތް ފަޔަ އެންޑް ރެސްކިއު ސާވިސްއިން ކުރަމުންދާ ކަމަށެވެ.
އެގޮތުން މާލޭގެ ތިން ސަރަހައްދެއްގައި 11 ޕަމްޕު ބަހައްޓައިގެން މަސައްކަތް ކުރަމުން އަންނަ ކަމަށް އެމްއެންޑީއެފުން ބުންޏެވެ.
އަދި ބައެއް ގެތަކަށް ފެން ވަންނަމުންދާތީ އެހީތެރިކަން ފޯރުކޮށްދިނުމަށް މާލެ އޭރިއާ ކޮމާންޑުގެ ސިފައިން ހަރަކާތްތެރިވަމުންދާ ކަމަށް ވެސް އެމްއެންޑީއެފުން ބުންޏެވެ.
ފުލުހުންނާ މާލެ ސިޓީ ކައުންސިލުން ވެސް ދަނީ ވިއްސާރައިގައި މާލޭގެ ގޭގެއަށާއި ފިހާރަތަކަށް ފެން ވަނުން ރައްކާތެރި ކުރުމަށް ވެލިބަސްތާ ޖެހުމާއި ފެން ވަދެފައިވާ ގެތަކުން ފެން ހިންދުމުގެ މަސައްކަތުގައި ހަރަކާތްތެރިވަމުންނެވެ.
އެހީތެރިކަން ބޭނުންވާ ފަރާތްތަކުން 911 އަށް ގުޅުމަށް ފުލުހުން ވަނީ އެދިފަ އެވެ.
