އުސޫލު ބަދަލުކުރަން ނިންމުމުން ހައްޖު ކޯޕަރޭޝަންގެ އެމްޑީގެ ތައުރީފް ރައީސް މުއިއްޒުއަށް
އަންނަ އަހަރުން ފެށިގެން ރާއްޖެއިން ހައްޖަށް މީހުން ގެންދިއުމާ ބެހޭ އުސޫލަށް ބަދަލު ގެނައުމަށް ނިންމުމުން ހައްޖު ކޯޕަޜޭޝަންގެ މެނޭޖިން ޑިރެކްޓަރު މުޙައްމަދު ޝަކީލް ރައީސް ޑރ.މުހައްމަދު މުއިއްޒުއަށް ތައުރީފް ކުރައްވައިފި އެވެ.
ހައްޖު އަދާކުރުމަށް ދިގު އިންތިޒާރެއްގައި ތިބި ފަރާތްތަކަށް ހައްލެއް ހޯދައިދިނުމުގެ ގޮތުން އިސްލާމިކް މިނިސްޓްރީން ހުށަހެޅުއްވި ކަރުދާހަށް ކެބިނެޓުގައި މަޝްވަރާ ކުރެއްވުމަށް ފަހު އުސޫލަށް ބަދަލު ގެންނަން ރައީސް މުއިއްޒު ނިންމެވީ މިއަދު އެވެ.
އެ ނިންމުމާ ގުޅިގެން އެމްޑީ ޝަކީލް އެކްސްގައި ވިދާޅުވީ ރައީސްގެ ނިންމެވުމަކީ ރައްޔިތުންނަށްޓަކާ ނިންމެވި ވަރަށް ރަނގަޅު ނިންމެވުމެއް ކަމަށެވެ. އަދި ރައީސްއަށް ޝުކުރުވެސް ޝަކީލް އަދާކުރެއްވި އެވެ.
"މި ނިންމެވުމުގެ ސަބަބުން އުމުރުން ދުވަސްވީ ފަރާތްތަކުން ޙައްޖުގެ އަޅުކަން އަދާ ކުރުމަށް ކުރަމުން އައި އިންތިޒާރަށް ވަރަށްބޮޑު ލުޔެއް ލިބިގެންދާނެ."ޝަކީލް ވިދާޅުވި އެވެ.
ރާއްޖެއިން ހައްޖަށް މީހުން ގެންދިޔުމާބެހޭ އުސޫލަށް ބަދަލު ގެނައި ކަންކަމުގެ ތެރޭގައި ހިމެނެނީ:
- އަލަށް ހައްޖުގެ އަޅުކަން އަދާކުރަން އެދޭ ފަރާތްތަކަށް އިސްކަންދިނުން.
- ހައްޖުގެ އަޅުކަން އަދާކޮށްފައިނުވާ ފަރާތްތަކުގެ ތެރެއިން އުމުރުން 65 އަހަރުން ފެށިގެން މަތީގެ ފަރާތްތަކަށް ކޮންމެ އަހަރަކު ހައްޖު ކޯޕަރޭޝަނުން ކަނޑައަޅާ ވަކި އިންސައްތައެއް ހާއްސަކުރުން.
- ހައްޖުގެ އަޅުކަން އަދާކޮށްފައިނުވާ އުމުރުން 75 އަހަރުން ފެށިގެން މަތީގެ ފަރާތްތަކުގެ ތެރެއިން ސިއްހީ ހާލަތަށް ބަލައި އެހީތެރިއަކު ގެންދަން ޖެހޭ ފަރާތްތަކަށް އެހީތެރިއަކު ހަމަޖައްސަން ފުރުސަތު ދިނުން. ނަމަވެސް އެހީތެރިއެއްގެ ގޮތުގައި ގެންދެވޭނީ، (ކޯޕަރޭޝަނުގެ ލިސްޓުގައި އާއިލާގެ މީހަކު ހިމެނޭ ނަމަ އެމީހެއް) ކުރިން ހައްޖުގެ އަޅުކަން އަދާކޮށްފައި ނެތް ފަރާތެއް ކަމަށާ އަދި ހައްޖުގެ އަޅުކަން އަދާކޮށްފައިވާ ފަރާތެއް އެހީތެރިއެއްގެ ގޮތުގައި ގެންދެވޭނީ، ހައްޖުގެ އަޅުކަން އަދާކޮށްފައިނުވާ ފަރާތެއް އޭނާއަށް ލިބެން ނެތް ހާލަތުގައި ކަމަށް ކަނޑައެޅުން. (ސިއްހީ ހާލަތު ކަށަވަރުކުރާނީ، ހައްޖު ކޯޕަރޭޝަނުގެ ފަރާތުން ކަނޑައަޅާ ޑޮކްޓަރުން މެދުވެރިކޮށް)
- ކުރިން ހައްޖުގެ އަޅުކަން އަދާކޮށްފައިވާ ފަރާތަކަށް އިތުރު ފުރުސަތެއް ދެވޭނީ، އެންމެފަހުން ހައްޖުގެ އަޅުކަން އަދާކުރިތާ ހިޖުރީގޮތުން 5 އަހަރު ވުމުން ކަމަށް ކަނޑައެޅުން.
- ހައްޖު ކޯޕަރޭޝަނުގެ ފަރާތުން ހައްޖުގެ ހިދުމަތްތެރީންގެ ގޮތުގައި ގެންދާ ފަރާތްތައް (ހ)، (ނ) އަދި (ރ) އިން އިސްތިސްނާކުރުން.
ޝުކުރިއްޔާ ޢިއްޒަތްތެރި ރައީސް ރައްޔިތުންނަށް ތިކޮއްދެއްވި މަސައްކަތަށް އައްސަރިބަހާއި ސާބަސް