މޯލްޑިވިއަންގެ ފްލީޓަށް ވައިޑް ބޮޑީ އެއާކްރާފްޓެއް އިތުރުކޮށްފި

ގައުމީ އެއާލައިން، މޯލްޑިވިއަންގެ ފްލީޓަށް އަލަށް އިތުރުވާ ވައިޑް ބޮޑީ އެއާކްރާފްޓް (އޭއާބަސް އޭ-330) މިއަދު ރާއްޖެ ގެނެސްފި އެވެ.

Ads by MWSC

ވައިޑް ބޮޑީ އެއާކްރާފްޓް ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ޖައްސާފައި ވަނީ މިއަދު ހަވީރު 5:14 ގަ އެވެ. ބޯޓު ޖެއްސުމާ އެކު ވޯޓާ ސެލިއުޓެއް ވަނީ ދީފަ އެވެ.

ބޯޓު ގެނައުން ފާހަގަކުރަން ވީއައިއޭގައި ހާއްސަ ރަސްމިއްޔާތެއް ވަނީ ބާއްވާފަ އެވެ. އެ ރަސްމިއްޔާތުގައި ރައީސް ޑރ. މުހައްމަދު މުއިއްޒުގެ ދެކަނބަލުންނާއި ނައިބު ރައީސް ހުސައިން މުހައްމަދު ލަތީފާއި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަދި ޓްރާންސްޕޯޓް މިނިސްޓަރު މުހައްމަދު އަމީން ބައިވެރިވެ ވަޑައިގެންނެވި އެވެ. އޭގެ އިތުރުން އައިލެންޑް އޭވިއޭޝަނުގެ ވެރިންނާއި މިނިސްޓަރުންނާއި މަޖިލީހުގެ މެންބަރުން ވެސް ބައިވެރިވެ ވަޑައިގެންނެވި އެވެ.

މޯލްޑިވިއަންގެ 24 އަހަރުވީ ތާރީހުގައި ގެނައި އެންމެ ބޮޑު ބޯޓު ރާއްޖެ ގެނައުން ފާހަގަކުރަން މާލޭގެ އުސްފަސްގަނޑު ސަރަހައްދާއި ހުޅުމާލޭގެ ފޭސް އެކެއް އަދި ފޭސް ދޭއް ހިމެނޭ ސަރަހައްދުގައި އެއާ ޝޯއެއް މިވަގުތު އެބަ ހިނގަ އެވެ.

މި ބޯޓަކީ 264 މީހުންގެ ޖާގައިގެ ބޯޓެކެވެ. ބޯޓުގެ ދަތުރުތައް ފަށަން ހަމަޖެހިފައިވަނީ މި މަހުގެ 22 ވަނަ ދުވަހުގަ އެވެ. އާ ބޯޓުން ޗައިނާގެ 3 ސިޓީއެއްގެ އިތުރުން ޔޫރަޕަށް ދަތުރުތައް ކުރަން ހަމަޖެހިފައިވާ ކަމަށް މީގެކުރިން މޯލްޑިވިއަނުން ބުނެފައިވެ އެވެ.

ވައިޑް ބޮޑީ އެއާކްރާފްޓަށް ބޭނުންވާ މުވައްޒަފުން ވަޒީފާއަށް މިހާރު ވަނީ ނަގާފަ އެވެ. އޭގެ ތެރޭގައި އޭ-330 ގެ ކެޕްޓަން ޓްރެއިނީއަކާއި އެ ރޭޓިންގެ 2 ކެޕްޓަނުންނާއި 2 ފަސްޓް އޮފިސަރުން ހިމެނޭ އެވެ. ކެބިން ކްރޫއިންގެ ގޮތުގައި 14 މުވައްޒަފުން ނެގިއިރު، ޗައިނާ ބަހުން ވާހަކަ ދައްކާ 8 ކެބިން ކްރޫއިން ހިމެނޭ އެވެ. އޭގެ އިތުރުން 2 އިންޖިނިއަރުން ވެސް ނެގި އެވެ.

މި ބޯޓާ އެކު މޯލްޑިވިއަންގެ ފްލީޓުގައި 25 ބޯޓު އޮތްއިރު، އޭގެ ތެރޭގައި އިތުރަށް ހިމެނެނީ އެއާބަސް އޭ-320 މަރުކާގެ ބޯޓަކާއި ޑޭޝް މަރުކާގެ 6 ބޯޓެއްގެ އިތުރުން ޑޭޝް ޓުވިން އޮޓާގެ 11 ބޯޓެވެ.