ޕާކިސްތާނުގެ އާ ސަފީރުގެ ފަތްކޮޅު ރައީސަށް އަރުވައިފި
އިސްލާމިކް ރިޕަބްލިކް އޮފް ޕާކިސްތާނުގެ އާ ސަފީރު ފައިސަލް ރަސުލް ލޯދީގެ ސަފީރުކަމުގެ ފަތްކޮޅު ރައީސް ޑރ. މުުހައްމަދު މުއިއްޒަށް އަރުވައިފި އެވެ.
ޕާކިސްތާނުގެ ސަފީރުކަމުގެ ފަތްކޮޅު އަރުވާފައިވަނީ މިއަދު ހެނދުނު ރައީސް އޮފީހުގައި ބޭއްވި ރަސްމިއްޔާތެއްގަ އެވެ.
ރައީސް އޮފީހުން ބުނީ ފަތްކޮޅު އެރުވުމުގެ ރަސްމިއްޔާތަށް ފަހު ރައީސް ވަނީ ފައިސަލްއަށް މަރުހަބާ ވިދާޅުވެފައި ކަމަށެވެ.
ދެ ގައުމުގެ ގުޅުން ބަދަހިކުރުމާއި، މޫސުމަށް އަންނަ ބަދަލުތަކާއި، ސިއްހަތާއި، ފަތުރުވެރިކަމާއި، ވިޔަފާރީގެ ދާއިރާތައް ހިމެނޭ ގޮތަށް ދެ ފަރާތަށް މުހިންމު ދާއިރާތަކުގައި އެއްބާރުލުން އިތުރުކުރުމާ ބެހޭގޮތުން ދެ ބޭފުޅުން މަޝްވަރާކުރެއްވި ކަމަށް ރައީސް އޮފީހުން ބުންޏެވެ.
އެ އޮފީހުން ބުނީ ސަފީރު ވަނީ ފަލަސްތީނުގެ ރައްޔިތުންގެ ހައްގުގައި ރާއްޖެއިން ގެންގުޅެމުން އަންނަ ސިޔާސަތަށް ތައުރީފު ކުރައްވާފައިވާ ކަމަށެވެ.
ޕާކިސްތާނުން ރާއްޖެއަށް ކަނޑައެޅުއްވި އާ ސަފީރު ފައިސަލް ވަނީ ޕާކިސްތާނުގެ އަސްކަރިއްޔާގައި ހަރަކާތްތެރިވެ ވަޑައިގެންފަ އެވެ. ރިޓަޔަ ކުރެއްވިއިރު ހުންނެވީ ޕާކިސްތާން ނޭވީގެ އެޑްމިރަލްއެއްގެ މަގާމުގަ އެވެ.
އޭނާ ވަނީ 2020 ވަނަ އަހަރުގެ އޮކްޓޫބަރު މަހުން ފެށިގެން 2021 ވަނަ އަހަރުގެ މާޗް މަހުގެ ނިޔަލަށް ކަރާޗީގެ ކޮމާންޑަރުކަން ކުރައްވާފަ އެވެ. އަދި އިސްލާމްއާބާދުގައި ހުންނަ ނޭވަލް ހެޑްކުއާޓަރުގައި ވައިސް ޗީފް އޮފް ނޭވަލް ސްޓާފްގެ ދައުރު އަދާކުރައްވާފައިވެ އެވެ.
އެންމެފަހުން ހުންނެވީ ކަރާޗީ ޑިވިޝަންގެ ޓްރެއިނިން ޔުނިޓުތަކާ އަދި ނޭވީން ކުރިއަށް ގެންދާ ހަރަކާތްތައް ވިލަރެސް ކުރެއްވުމާ ހަވާލުވެވަޑައިގެންނެވެ.
