ވަގު ފޯމުތަކުގެ މައްސަލަ އެމްޑީޕީން ފުލުހަށާއި އޭސީސީއަށް ހުށަހަޅައިފި
ވަގު ފޯމު ފުރައިގެން ސަރުކާރު ހިންގާ ޕީއެންސީއަށް މީހުން ވެއްދި މައްސަލަ އެމްޑީޕީން އިދާރާތަކަށް ހުށަހަޅައިފި އެވެ.
އެމްޑީޕީން މިއަދު އެކްސްގައި ބުނީ އެ ވަގު ފޯމުތައް އިލެކްޝަންސް އަށް ހުށަހެޅީ ރައްޔިތުންގެ ޒާތީ މައުލޫމާތުން ވައްކަންކޮށް ކަމަށެވެ.
އެހެންވެ އެ މައްސަލައިގައި ހިމެނޭ ޖިނާއީ ކުށްތައް ތަހުގީގު ކުރުމަށް ފުލުހުންނާއި އޭސީސީއަށް އެ ޕާޓީން ހުށަހަޅައިފައިވާ ކަމަަށް އެމްޑީޕީން ބުނެފައިވެ އެވެ.
އޭގެ އިތުރުން މި މައްސަލަތައް ތަހުގީގު ކުރުމަށް އެ ދެ އިދާރާގެ މައްޗަށް އަމުރުކޮށްދެއްވުމަށް އެދި ޕީޖީގައި ވެސް އެދިފައިވާ ކަމަށް އެމްޑީޕީން ބުންޏެވެ.
"މީގެ އިތުރުން، ޕީއެންސީން ހުށަހެޅި އެއްވެސް ފޯމެއް ޕްރޮސެސް ނުކުރުމަށާއި، ޕްރޮސެސް ކުރި ފޯމުތައް ކެންސަލްކޮށް، އެ ފޯމުތަކުގެ ސައްހަކަން އަލުން ކަށަވަރުކުރުމަށް އެދި އިލެކްޝަންސް ކޮމިޝަނަށް ވެސް ސިޓީއެއް ވަނީ ފޮނުވާފައި." އެމްޑީޕީން އެކްސްގައި ބުނެފައިވެ އެވެ.
ރައީސް ޑރ މުހައްމަދު މުއިއްޒު ވެރިކަމާ ހަވާލުވެވަޑައިގަތުމާ އެކީ ޕީއެންސީއަށް 75،000 މެންބަރުން ހަމަކުރުމުގެ މަސައްކަތް ފެށި އެވެ. އެ ހަރަކާތް ހިނގަމުން ދަނިކޮށް ވެސް ސައްހަ ނޫން ފޯމުތަކެއް ހުށަހަޅާ ކަމަށް ގިނަ ބަޔަކު ދިޔައީ ތުހުމަތުކުރަމުންނެވެ.
މިދިޔަ ދެ ހަފުތާއެއްހާ ދުވަހު އެމްޑީޕީގެ ބައެއް މެންބަރުން އެ މީހުންނަށް ނޭނގި ޕީއެންސީއަށް ވައްދާފައިވާކަން ފެންމަތިވި އެވެ.
އެމްޑީޕީގެ ގައުމީ މަޖިލީހުގެ ބައެއް މެންބަރުން ވެސް އޭގެ ތެރޭގައި ހިމެނެ އެވެ. އެންމެ ފަހުން އެމްޑީޕީގެ މަޖިލިސް މެންބަރު، ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓެ) ވެސް ޕީއެންސީއަށް ވައްދާފައިވާކަން ފެންމަތިވި އެވެ.
