އޭސީސީއަށް އައްޔަނުކުރަން ރައީސް ފޮނުއްވި ދެ ބޭފުޅުންނަށް ރުހުން ދީފި
އެންޓި ކޮރަޕްޝަން ކޮމިޝަންއަށް އައްޔަނުކުރަން ރައީސް ޑރ. މުހައްމަދު މުއިއްޒު ހުށަހެޅުއްވި ދެ ބޭފުޅުންނަށް ރައްޔިތުންގެ މަޖިލީހުން ރުހުން ދީފި އެވެ.
އެ ދެ މަގާމަށް އައްޔަނުކުރަން ދެވަނަ ފަހަރަށް ރައީސް ނަން ފޮނުއްވި އިރު އޭގެ ތެރޭގައި މއ. ގޯލްޑަން މޫން/ އަހުމަދު ނާޝިދު އަދި ރ. އަލިފުށި/ފަސާނާ، އަބްދުﷲ ނާޝިދު، ހިމެނިވަޑައިގަންނަވަ އެވެ.
މިނިވަން މުވައްސަސާތަކުގެ ކޮމިޓީން އެ ބޭފުޅުންގެ ނަންތައް މިއަދު ދިރާސަކޮށް ނިންމައި ފާސްކުރި ފަހުން މިއަދު މެންދުރު ފަހު ވަނީ ޖަލްސާއެއް ބާއްވައި އެ ދެ ބޭފުޅުން މަގާމަށް އައްޔަނުކުރަން ރުހުން ދީފަ އެވެ.
ދެ ބޭފުޅުންނަށް ރުހުން ދޭން ފާސްކުރީ ވޯޓުގައި ބައިވެރިވި 68 މެމްބަރުންގެ ވޯޓާއެކު އެވެ.
އަހްމަދު ނާޝިދަކީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި އެކުލަވާލި ޕޮލިސް ބޯޑުގެ ހިމެނިވަޑައިގެން މެމްބަރުކަން ކުރައްވާފައިވާ ބޭފުޅެކެވެ.
އޭސީސީގެ ދެ މެމްބަރުންގެ މަގާމު މިދިޔަ ނޮވެމްބަރު މަހު ހުސްވީ އެ ކޮމިޝަނުގެ ނައިބު ރައީސް އަބްދުއްސަލާމާއި ކޮމިޝަނުގެ މެމްބަރު ތޯހާ މުހައްމަދު އިސްތިއުފާ ދެއްވުމުންނެވެ.
ސަަލާމާއި ތޯހާ އިސްތިއުފާ ދެއްވީ އެ ދެ ބޭފުޅުން ވަކިކުރަން މަޖިލިހުގެ މިނިވަން މުއައްސަސާތަކާ ބެހޭ ކޮމިޓީން ނިންމާފައި އޮއްވަ އެވެ.
އޭސީސީގެ މެމްބަރުންގެ ގޮތުގައި މިހާރު ތިއްބަވަނީ އެ ކޮމިޝަނުގެ ރައީސް އާދަމް ޝާމިލުގެ އިތުރުން ޝިޔާމާ މުހައްމަދާއި ޝަޒްނާ ހާޝިމެވެ.
Ads by STO
