ވަން ގަވްގައި ބައެއް އިދާރާތައް ބައިވެރިނުވާތީ ޓްރޭޑް ނެޓް މަޖިލީހަށް ހާޒިރުކުރަން އެދިއްޖެ
ސަރުކާރުން ހޯދަން ޖެޙޭ ހިދުމަތްތައް އެއް ވިއުގައެއްގެ ދަށުން ފޯރުކޮށްދިނުމުގެ ގޮތުން "ޓްރޭޑް ނެޓް މޯލްޑިވްސް ކޯޕަޜޭޝަން ލިމިޓެޑް"އިން އުފެއްދި "ަވަން ގަވް"ގައި ސަރުކާރުގެ ބައެއް އިދާރާތައް ބައިވެރިނުވާތީ ޓްރޭޑް ނެޓްގެ އިސް ބޭފުޅުން ރައްޔިތުންގެ މަޖިލީހަށް ހާޒިރުކޮށްދޭން އެދިއްޖެ އެވެ،
ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް (ކުޑޫ) ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއަށް ފޮނުއްވި ސިޓީއެއްގައި ވިދާޅުވީ 2024އާ ހަމައަށް ވަން ގަވްއިން ހިދުމަތް ފޯރުކޮށްދެނީ 14 އިދާރާއަކުން ކަމަށާއި އޭގައި ސަރުކާރުގެ ހުރިހާ އިދާރާއެއް ނުހިމެނޭ ކަމަށެވެ.
މުހައްމަދު އިބްރާހީމް ވިދާޅުވީ ވަންގަވްގައި ބައިވެރިނުވެ އަމިއްލަ އިދާރާތަކުން އެހެން ވިއުގައެއް ގާއިމުކޮށްގެން ކުރިއަށް ދިއުމަކީ ކޮރަޕްޝަނަށް މަގުފަހިވެ، މަސައްކަތުގެ ސްޕީޑާއި އެފިޝިއެންސީއަށް އަސަރުކުރާނެ ކަމެއް ކަމަށެވެ. އަދި ވަކި ވަކި އިދާރާާތަކުން އެހެން ވިއުގަތައް ގާއިމުކުރުމަކީ ބޮޑެތި އިސްރާފެއް ކަމަށް ވެސް އޭނާ ފާހަގަކޮށްފައިވެ އެވެ.
"މި ހުރިހާ ކަމަކަށް ހޭދަކުރާ ވަސީލަތްތަކާއި ފައިސާއަކީ ދައުލަތުގެ އޮފީސްތައް ހިންގުމަށް ކުރާ ހަރަދުން ސަލާމަތްކޮށް އެ ކަންކަމުން އެއަށް ވުރެ ޒަރޫރީ ބޭނުންތަކަށް ރައްކާކުރެވޭނެ ފައިސާއާއި ވަސީލަތްތަކެވެ،" މުހައްމަދު އިބްރާހިމް ސިޓީގައި ވިދާޅުވެފައިވެ އެވެ.
ވަން ގަވްގައި ބައިވެރިނުވާ އިދާރާތަކުން އެ ވިއުގައިގައި ބައިވެރިނުވާ ސަބަބުތަކާއި އެކަމަށް ހުރި ހުރަސްތައް ދެނެގަނެ އެކަމަަށް ހައްލެއް ހޯދުމަކީ ކޮންމެހެން ކުރަން ޖެހޭ ކަމެއް ކަަމަށް ވެސް އިބްރާހިމް ވިދާޅުވި އެވެ.
އެހެންވެ މުހައްމަދު އިބްރާހިމް އެދިވަޑައިގެންނެވީ ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސް ކޮމިޓީއަށް ޓްރޭޑް ނެޓް މޯލްޑިވްސް ކޯޕަރޭޝަންގެ އިސް ފަރާތްތައް ހާޒިރުކޮށް އެ ކަމުގައި ކުރިއަށް ދެވޭނެ މަގެއް ހޯދައި ދެއްވުމަށެވެ.
