ޓެރަރިސްޓް ހަމަލާއަކުން ދިފާއުވުމުގެ ގާބިލުކަން އިތުރުކުރަން ތަމްރީނެއް ބާއްވަައިފި
ރާއްޖެއަށް ޓެރަރިސްޓު ހަމަލާއެއް އަންނަ ހާލަތުގައި އެކަމަށް ހުޝިޔާރުވެ ތިބުމާއި ފާރަވެރިކަމާއެކު އެކަމަށް ރެސްޕޯންޑުކުރެވޭނެ ގާބިލުކަން އިތުރުކުރަން ފުލުހުންގެ 5 ރީޖަނަށް އަމާޒުކޮށްގެން ކުރިއަށްގެންދާ "ޓެރަރިޒަމް ރެސްޕޯންސް ޓްރެއިނިން'' ގެ ފޭސް 1 އަޕާ ނޯތު ޕޮލިހުގައި ކުރިއަށް ގެންގޮސްފި އެވެ.
ފުލުހުންގެ ވެބްސައިޓުގައި ޝާއިއުކުރި ހަބަރެއްގައި ބުނީ، އެ ޕްރޮގްރާމް ކުރިއަށް ގެންގޮސްފައިވަނީ މި މަހުގެ 20 އިން 23 އަށް ކުޅުދުއްފުށި ސިޓީއާއި ހއ. ހޯރަފުށީގައި ކަމަށެވެ.
މި މަހުގެ 20 ވަނަ ދުވަހު އެ ޕްރޮގްރާމް ފެށުމަށް ކުޅުދުއްފުށި ސިޓީގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ޑެޕިއުޓީ ކޮމިޝަނާ އޮފް ޕޮލިސް އިސްމާއީލް ނަވީން އެވެ. އެ ރަސްމިއްޔާތުގައި، އަޕާ ނޯތު ޕޮލިސް ކޮމާންޑަރު ޗީފް ސުޕްރިންޓެންޑެންޓް އޮފް ޕޮލިސް އިބްރާހީމް ޒުހުރީއާއި ކުޅުދުއްފުށީ ޕޮލިސް ކޮމާންޑަރު ސުޕްރިންޓެންޑެންޓް އޮފް ޕޮލިސް ރަޙްމާ ސައީދު އަދި ކައުންޓާ ޓެރަރިޒަމް އިންޓެލިޖެންސް ޑިޕާޓްމަންޓުގެ އިސް ބޭފުޅުންނާއި އަޕާ ނޯތު ޕޮލިހުގެ ފުލުހުން ބައިވެރިވެލެއްވި އެވެ.
ފުލުހުންގެ ކައުންޓާ ޓެރަރިޒަމް އިންޓެލިޖެންސް އަދި އިނގިރޭސިވިލާތުގެ ސަރުކާރު ގުޅިގެން ހިންގަމުންދާ "އިންޓަނޭޝަނަލް ޕްރޮޓެކްޓް އެންޑް ޕްރިޕެއާ" ޕްރޮގްރާމްގެ ދަށުން، މުޅި ރާއްޖެ ހިމެނޭހެން ކުރިއަށް ގެންދިއުމަށް ހަމަޖެހިފައިވާ މި ޓްރެއިނިން ޕްރޮގްރާމްގެ ފޭސް 1ގައި އަޕާ ނޯތު ޕޮލިހުގައި ދެ ޓްރެއިނިން ޕްރޮގްރާމް ކުރިއަށް ގެންގޮސްފައިވެ އެވެ.
އެގޮތުން، ފްރޮންޓްލައިންގައި މަސައްކަތްކުރާ ފަސްޓް ރެސްޕޯންޑާސްއަށް އަމާޒުކޮށްގެން "ޓެރަރިޒަމް އިންސިޑެންޓް ފަސްޓް ރެސްޕޮންޑާސް'' ޕްރޮގްރާމް ކުރިއަށް ގެންގޮސްފައިވަނީ މި މަހުގެ 20 ވަނަ ދުވަހު އެވެ. ކުޅުދުއްފުށި ސިޓީގައި ކުރިއަށްގެންދިޔަ ޕްރޮގްރާމުގައި ހއ. ހދ. ށ އަދި ކުޅުދުއްފުށި ސިޓީގައި މަސައްކަތްކުރާ ފުލުހުން ހިމެނޭގޮތަށް 45 ފުލުހުން ބައިވެރިވި އެވެ.
އެ ޕްރޮގްރާމް މި މަހު 21 އިން 23 އަށް ކުރިއަށްގެންގޮސްފައިވަނީ ހޯރަފުށީގައެވެ. ހއ. ހދ އަދި ށ އަތޮޅުގެ ޕޮލިސް ސްޓޭޝަންތަކުގެ އިންޗާޖުންނާއި ކުޅުދުއްފުށި ސިޓީ ޕޮލިހުގެ ޔުނިޓުތަކުގެ ހެޑުން ހިމެނޭގޮތަށް ރެސްޕޯންސްގެ ސުޕަވައިޒަރީ ލެވެލްގައި މަސައްކަތްކުރާ 27 ފުލުހުން މި ޕްރޮގްރާމުގައި ބައިވެރިވި އެވެ. މި ޕްރޮގްރާމަކީ އިންސިޑެންޓް ކޮމާންޑުގެ ލެވެލްތަކާއި ކޮމާންޑް އެންޑް ކޮންޓްރޯލް ހިމެނޭހެން ފަރުމާކުރެވިފައިވާ ޓްރެއިނިން ޕްރޮގްރާމެކެވެ.
ފުލުހުން ބުނީ އެ ޕްރޮގްރާމްގެ ދަށުން ޓެރަރިޒަމްގެ ހާދިސާއެއް ކުރިމަތިވެއްޖެ ހާލަތުގައި، ރާއްޖޭގެ މީހުން ދިރިއުޅޭ ރަށްރަށާއި ރިސޯޓުތަކާ އަދި ސިނާއީ މަސައްކަތްކުރާ ރަށްރަށާ އެންމެ ގާތުން އެކަމަށް އިޖާބަދޭ ފަސްޓް ރެސްޕޯންޑާޒް އަދި ސުޕަވައިޒަރީ ލެވެލްތަކުގެ ފުލުހުން އަމަލުކުރާނެ ގޮތްތަކާއި އެފަދަ ސީންތަކުގައި ހަރަކާތްތެރިވާނެ ގޮތްތަކުގެ އިތުރުން ސަމާލުކަންދޭންޖެހޭ ކަންކަން އެނގިގެންދާނެ ކަމަށެވެ.
