ރާއްޖޭގެ މުސްތަގުބަލަށް އިއާދަކުރަނިވި ހަކަތައަށް އިންވެސްޓް ކުރުން ލާޒިމު: ރައީސް
މޫސުމަށް އަންނަ ނޭދެވޭ ބަދަލުތަކުގެ ހިރާސް ބޮޑު، ބިންތިރި ޖަޒީރާ ގައުމެއްގެ ހައިސިއްޔަތުން އިއާދަކުރަނިވި ހަކަތައިގެ ވަސީލަތްތަކަށް އިންވެސްޓް ކުރުމަކީ ރާއްޖޭގެ މުސްތަގުބަލަށް ކުރުމަށް ލާޒިމު ކަމެއް ކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް އެހެން ވިދާޅުވީ ބައިނަލްއަގުވާމީ ފެންވަރުގައި ފާހަގަކުރަމުން އަންނަ ޑޭ އޮފް ކްލީން އެނަޖީ ނުވަތަ ސާފު ހަކަތައިގެ ދުވަހުގެ މުނާސަބަތުގައި މިއަދު ހިއްސާކުރެއްވި ހާއްސަ މެސެޖުގަ އެވެ.
ރައީސް ވިދާޅުވީ މޫސުމަށް އަންނަ ނޭދެވޭ ބަދަލުތަކުގެ ހިރާސް ބޮޑު، ބިންތިރި ޖަޒީރާ ގައުމެއްގެ ހައިސިއްޔަތުން އިއާދަކުރަނިވި ހަކަތައިގެ ވަސީލަތްތަކަށް އިންވެސްޓް ކުރުމަކީ ރާއްޖޭގެ މުސްތަގުބަލަށް ޓަކައި ކުރުމަށް ލާޒިމު ކަމެއް ކަމަށެވެ.
އިއާދަކުރަނިވި ހަކަތަ ކުރިއެރުވުމުގައި، ހާއްސަކޮށް ސޯލާ ޕަވާ އިނީޝިއޭޓިވްސް ނުވަތަ އިރުގެ އަވިން ހަކަތަ އުފެއްދުމުގެ ރޮނގުން ރާއްޖެއިން ބޮޑެތި ކުރިއެރުންތަކެއް ހޯދާފައިވާ ކަމަށެވެ. އަދި 2028 ވަނަ އަހަރު ނިމޭއިރު، ރާއްޖޭގައި ބޭނުން ކުރާ ކަރަންޓު ހަކަތައިގެ 33 އިންސައްތައަކީ އިއާދަކުރަނިވި ހަކަތައަށް ހެދުމަކީ ސަރުކާރުން ވަރުގަދަ އަޒުމެއްގައި ކަނޑައަޅާފައިވާ އޮތް އަމާޒެއް ކަމުގައި ރައީސް ފާހަގަކުރެއްވި އެވެ.
ރައީސްގެ މެސެޖުގައި ހަކަތައިގެ ގާނޫނާއި ހަކަތައިގެ ދާއިރާގެ މަގުޗާޓުގައި، ހަކަތައިގެ ސަޕްލައިއަކީ އެކަށީގެންވާ، އިތުބާރު ހިފޭ، ދެމެހެއްޓެނިވި، ރައްކާތެރި އަދި ހެޔޮ އަގުގައި ހަކަތަ ފޯރުކޮށްދޭ ނިޒާމަކަށް ހެދުމަކީ ސަރުކާރުގެ އަމާޒު ކަމުގައި ބަޔާންކޮށްފައިވެ އެވެ.
އިއާދަކުރަނިވި ހަކަތައަށް ކުރާ އިންވެސްޓްމަންޓްތަކުގެ ދާއިރާގައި ރާއްޖޭގެ ޕްރައިވެޓް ސެކްޓާއިން މުހިންމު ދައުރެއް އަދާކުރަމުންދާކަން ފާހަގަކުރައްވާ ރައީސް ވަނީ މި މަސައްކަތުގައި ދެމިތިބުމަށް ހިތްވަރު ދެއްވާފަ އެވެ. މި މަސައްކަތްތަކުގެ ސަބަބުން، ބައިނަލްއަގުވާމީ ފެންވަރުގައި ކަނޑައަޅާފައިވާ މޫސުމީ ލަނޑުދަނޑިތައް ހާސިލުކުރުމުގެ އިތުރުން ހަކަތައިގެ ރައްކާތެރިކަމާއި އިގުތިސޯދީ ހަރުދަނާކަން އިތުރުވެގެންދާ ކަމުގަ އެވެ.
ސާފު ހަކަތައިގެ އުންމީދުތައް ހަގީގަތަކަށް ހެދުމަށް ދުނިޔޭގެ އެކި ކަންކޮޅުތަކުގައި ތިބި ފައިސާގެ އެހީދޭ ބައިވެރިން ދެމުން އަންނަ އެއްބާރުލުމަށް އެމަނިކުފާނުގެ މެސެޖުގައި ވަނީ ޝުކުރު އަދާކުރައްވާފަ އެވެ. އިތުރަށް ވިދާޅުވީ ކުދި ޖަޒީރާ ގައުމުތައް ނުވަތަ ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް) އަށް ދޭ އެހީ، ކުރިއަށް އޮތް އަހަރު ތަކުގައި އިތުރުކުރަން ޖެހޭ ކަމަށެވެ.
އަދި މި ދުވަހުގެ މުހިންމުކަމާ މެދު ވިސްނާ، ގްރީންހައުސް ގޭސް (ޖީއެޗްޖީ) ނުވަތަ ޖައްވު ހޫނުކުރާ ވިހަ ގޭސްތައް ބޭރުކުރާ މިންވަރު މަދުކޮށް، ސާފު ހަކަތައަށް ބަދަލުވެ، ދުނިޔެ ހިމާޔަތް ކުރުމަށް ޓަކައި މަސައްކަތް ކުރުމަށް ވެސް ވަނީ ގޮވާލައްވާފަ އެވެ.
ރައީސްގެ މެސެޖު ނިންމަވާލައްވާފައި ވަނީ ރާއްޖޭގެ ރަށްތައް ހިމާޔަތްކޮށް، ދުޅަހެޔޮ ވެއްޓެއް ގާއިމުކޮށް، އެހެން ގައުމުތަކަށް ވެސް ނަމޫނާއެއްގެ ގޮތުގައި ސާބިތުވެ އޮންނާނެ ކަމަށާއި ގައުމާއި ދުނިޔޭގެ ލާބަ އާއި މަންފާއަށް ސަރުކާރުން މަސައްކަތް ކުރަމުން ގެންދާނީ ސާފު ހަކަތައިގެ މަގުގައި ކަމުގެ ޔަގީންކަން ދެއްވަމުންނެވެ.
Ads by STO
