ވޯޓަކަށް ނުގޮސް ޑިމޮކްރެޓްސްގެ ރައީސްކަން އިންތިއަށް
ވޯޓަކަށް ނުގޮސް، ޑިމޮކްރެޓްސްގެ ރައީސް ކަން ރައްޔިތުންގެ މަޖިލީހުގެ މާފަންނު އުތުރު ދާއިރާގެ ކުރީގެ މެންބަރު އިމްތިޔާޒު ފަހުމީ (އިންތި) އަށް ލިބިއްޖެ އެވެ.
ޑިމޮކްރެޓްސްގެ ރައީސްގެ މަގާމު ހުސްވީ ކުރިން އެ މަގާމުގައި ހުންނެވި، މަޖިލީހުގެ ހެންވޭރު ހުޅަނގު ދާއިރާގެ ކުރީގެ މެންބަރު ހަސަން ލަތީފު އެ ޕާޓީން ވަކިވެވަޑައިގެން އަނބުރާ އެމްޑީޕީއަށް ގުޅިވަޑައިގަތުމުންނެވެ. އޭގެ އިތުރަށް ޕާޓީގެ ނައިބު ރައީސް މުހައްމަދު ޝިފާޒު (ޝިއްޕެ) ވެސް ވަނީ އެމްޑީޕީއަށް ވަޑައިގެންފަ އެވެ.
ކުރީގެ ރައީސް މުހައްމަދު ނަޝީދުގެ ވަފާތެރިން އިސްވެ އުފެއްދި ޕާޓީގެ އެންމެ އިސް ދެ މަގާމު ހުސްވުމުން ހުޅުވާލި ފުރުސަތުގައި ރައީސްގެ މަގާމަށް ކުރިމަތިލެއްވި އިމްތިޔާޒު އެކަންޏެވެ. ނައިބު ރައީސްގެ މަގާމަށް ކުރިމަތިލެއްވީ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު (ފައިނު ވައްޑެ) އެކަންޏެވެ.
މަގާމުތަކަށް ބޭނުންވާ އަދަދަށް ކުރިމަތިލުމުން، އިތުރު ވޯޓަކަށް ނުގޮސް ޕާޓީގެ ރައީސް ކަމަށް އިމްތިޔާޒު އަދި ނައިބު ރައީސް ކަމަށް ވަހީދު އިންތިހާބުވެފައިވާ ކަން އިއުލާން ކުރެއްވީ ޕާޓީ ވަގުތީ ގޮތުން ހިންގެވުމާ ހަވާލުވެ ހުންނެވި ޒުވާން ނައިބު ރައީސް ހުސައިން ފިރުޝާނެވެ.
މިރޭ ބޭއްވި ޑިމޮކްރެޓްސްގެ ގައުމީ މަޖިލީހުގެ ބައްދަލުވުމުގެ ތެރެއިން - ފޮޓޯ: ޑިމޮކްރެޓްސް
މި ޕާޓީއަކީ، ރާއްޖޭގެ އެންމެ ބޮޑު އެއް ޕާޓީ ކަމަށްވާ އެމްޑީޕީގެ އެތެރޭގައި އުފެދުނު ހިޔާލު ތަފާތުވުންތަކުގެ ތެރެއިން ނަޝީދާއި އެމަނިކުފާނުގެ ވަފާތެރިން އެމްޑީޕީން ބޭރު ކުރާނެ ކަމުގެ ސިގުނަލް ލިބިގެން މިދިޔަ ރިޔާސީ އިންތިހާބާ ދިމާކޮށް އުފެއްދި ޕާޓީއެކެވެ.
ޑިމޮކްރެޓްސް އުފެއްދި ފަހުން އެ ޕާޓީއަށް އިންތިހާބުތަކުގައި މާ ބޮޑު ކާމިޔާބީއެއް ނުލިބެ އެވެ. މަޖިލިސް އިންތިހާބުގައި އެންމެ ގޮނޑިއެއް ވެސް ލިބިފައެއް ނުވެ އެވެ. އެންމެ ފަހުން ހަސަން ލަތީފާއި ޝިފާޒުގެ އިތުރުން އެ ޕާޓީގެ ރައީސް ކަމަށް ވާދަކުރެއްވި އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރާއި، އެ ޕާޓީގެ ޕާލިމެންޓްރީ ގްރޫޕުގެ ލީޑަރުކަން ކުރެއްވި އަލީ އާޒިމް ވެސް އެމްޑީޕީއަށް ވަނީ ގުޅިފަ އެވެ.
