ރޯދަ ހަދިޔާ ހިފައިގެން ދިޔަ ދޯންޏެއް ފަރަށް އަރައި، ހުރިހާ އެއްޗެއް ކަނޑަށް
ގއ. ނިލަންދުއަށާއި އެ އަތޮޅު ދާންދުއަށް ރޯދަ ހަދިޔާ ހިފައިގެން ދަތުރުކުރި ދޯންޏެއް ފަރަށް އަރައި އޭގައި ހުރި ކާޑާއި ތަކެތި ކަނޑަށް ދޫވެއްޖެ އެވެ.
އެ ދެ ރަށަށް ރޯދަ ހަދިޔާ ހިފައިގެން ދިޔަ ލިއޯ ޓްރޭޑިންގެ، "ލިއޯ ވިންގް" އަރާފައި ވަނީ ގއ. އެކެފަރު ނަމަކަށް ކިޔާ ފަރަށެވެ. ފަރަށް އެރުމާ ގުޅިގެން ދޯންޏަށް ވަނީ ގެއްލުންތަކެއް ލިބިފަ އެވެ.
ނިލަންދޫ ކައުންސިލުގެ ރައީސް ނާސިހު އިބްރާހިމް "ދެން" އަށް ވިދާޅުވީ ފަރަށް އެރި ދޯންޏަކީ އެ ރަށާއި ދާންދޫއަށް ތަކެތި ހިފައިގެން ދިޔަ ލިއޯ ޓްރޭޑިންގެ ދޯންޏެއް ކަމަށެވެ. ދޯނި ފަރަށް އަރާފައި ވަނީ ރޭ ފަތިހުގެ ވަގުތެއްގައި ކަމަށެވެ. ފަރަށް އެރުމާ އެކު، ދޯނީގައި ހުރި 1،075 ބަސްތާ ކާޑާއި އެހެނިހެން ތަކެތި ކަނޑަށް ދޫވެފައިވާ ކަމަށް ނާސިހު ވިދާޅުވި އެވެ.
"އެއީ ހަނޑޫ، ހަކުރު، ފުށް 50 ކިލޯގެ ބަސްތާ. އެއްވެސް ވަރެއް ނުވޭ ސަލާމަތެއް. އެ ތަކެތީގެ އިތުރަށް ކަދުރު ވެސް ހުރި،" ނާސިހު ވިދާޅުވި އެވެ.
ދެ ރަށުގެ ރައްޔިތުންނަށް ބޭނުންވާ ތަކެތި ހަދިޔާކުރީ ލިއޯ ޓްރޭޑިންގެ ޗެއާމަން އަބްދުﷲ ސަވާދު އެވެ. އެއީ އޭނާ ކޮންމެ އަހަރެއްގެ ރޯދަ މަހު ވެސް ކުރައްވާ ކަމެއް ކަމަށް ނާސިހު ވިދާޅުވި އެވެ.
ދޯނި ފުންކުރުމަށް ލިއޯ ޓްރޭޑިން އާއި އެމްއެންޑީއެފްގެ ކޯސްޓްގާޑުން ކުރަމުން އަންނަ މަސައްކަތުގައި އަތޮޅުގެ ބައެއް ރަށްތަކުގެ އާންމުން ވެސް ދަނީ ހަރަކާތްތެރިވަމުންނެވެ. އެ މަސައްކަތުގައި ދޯނި އަދި ފުންކުރެވިފައި ނުވާ ކަމަށް ކައުންސިލުގެ ރައީސް ވިދާޅުވި އެވެ.
