ރޯދަ މަހު މާލެ ސަރަހައްދުގައި މުދާ އުފުލޭނެ ގަޑިތައް ކަނޑައަޅައިފި
ކުރިއަށް އޮތް ރޯދަ މަހު މާލެ ސަރަހައްދުގައި މުދާ އުފުލޭނެ ގަޑިތައް އިކޮނޮމިކް ޑިވެލޮޕްމެންޓް އެންޑް ޓްރޭޑް މިނިސްޓްރީން ކަނޑައަޅައިފި އެވެ.
މާލެ ސަރަހައްދުގައި ވިޔަފާރި މުދާ އުފުލޭނެ ގަޑިތައް ހާމަކުރީ ރޯދަ މަހަށް ސަރުކާރުން ވަމުން އަންނަ ތައްޔާރީތަކުގެ މައުލޫމާތު ހިއްސާކުރަން ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓްރީގެ ފަރާތުންނެވެ.
ބައްދަލުވުމުގައި އެ މިނިސްޓްރީގެ ޕޮލިސީ އެންޑް ރިސާޗް ކޮންސަލްޓެންޓް ފާތިމަތު ނަޝްވާ ބަދީއު ވިދާޅުވީ އާންމުންނަށާއި ވިޔަފާރިތަކަށް ވެސް މުދާ ސަޕްލައި ކުރުމުގައި އުދަނގޫ ނުވާނެ ގޮތް ބަލައިގެން މާލެ ސަރަހައްދުގައި ވިޔަފާރި މުދާ އުފުލުމުގެ ގަޑިތައް ކަނޑައެޅުމުގެ މަސައްކަތް ކުރަމުންދާ ކަމަށެވެ.
"ގަޑިތައް ހަމަޖެއްސުމަށް މިިނިސްޓްރީ އޮފް ޓްރާންސްޕޯޓް އަދި މޯލްޑިވްސް ޕޮލިސް ސާވިސް އަދި ގުޅުންހުރި އެހެން ފަރާތްތަކާ އެކު ވެސް މި ދަނީ މަޝްވަރާތައް ކުރަމުން،"
މަޝްވަރާތަކުގެ ތެރެއިން ރޯދަ މަހުގެ ފުރަތަމަ ދުވަހުން ފެށިގެން 19 ވަނަ ދުވަހުގެ ނިޔަލަށް އަދި ޝައްވާލު މަހުގެ ފުރަތަމަ 7 ދުވަހު މާލެ ސަރަހައްދުގައި ވިޔަފާރި މުދާ އުފުލޭނެ ކަމަށް މިހާރަށް ކަނޑައަޅާފައިވާ ގަޑިތައް ހާމަކުރެއްވި އެވެ.
ބަރު އުޅަނދާއި ހުރިހާ ބާވަތެއްގެ މުދާ އުފުލާ އުޅަނދުތަކުގައި މުދާ އުފުލޭނެ ގަޑިތައް:
ހެނދުނު 9:30 އިން ހަވީރު 4:30 އަށް އަދި ރޭގަނޑު 8:00 އިން ހެނދުނު 6:00 އަށް
މުދާ އުފުލުމަށް ބޭނުންކުރާ އުޅަނދުތަކާއި ބަރު އުޅަނދުތައް ދުއްވުމާއި މުދާ އުފުލުން މަނާ ގަޑިތައް:
ހެނދުނު 6:00 އިން 9:30 އަށް އަދި ހަވީރު 4:30 އިން ރޭގަނޑު 8:00 އަށް
ފަހު ދިހައިގައި މުދާ އުފުލަން ހާއްސަ ގަޑިތަކެއް ކަނޑައަޅާފައިވާކަން ވެސް ނަޝްވާ ފާހަގަކުރެއްވި އެވެ.
ބަރު އުޅަނދާއި ހުރިހާ ބާވަތެއްގެ މުދާ އުފުލާ އުޅަނދުތަކުގައި މުދާ އުފުލޭނެ ގަޑިތައް:
ހެނދުނު 6:00 އިން ހަވީރު 4:30 އަށް އަދި ރޭގަނޑު 8:00 އިން ހެނދުނު 6:00 އަށް
މުދާ އުފުލުމަށް ބޭނުންކުރާ އުޅަނދުތަކާއި ބަރު އުޅަނދުތައް ދުއްވުމާއި މުދާ އުފުލުން މަނާ ގަޑިތައް:
ހަވީރު 4:30 އިން ރޭގަނޑު 8:00 އަށް
ރޯދަ މަހު މުދާ ވިއްކާ ތަންތަނާއި ކެފޭ އަދި ރެސްޓޯރެންޓްތަކުން ހިދުމަތް ދެވޭނެ ގަޑިތައް އިކޮނޮމިކް މިނިސްޓްރީން މީގެކުރިން ވަނީ އާންމުކޮށްފަ އެވެ.
އެ މިނިސްޓްރީން މި މަހުގެ 9 ވަނަ ދުވަހު ގެޒެޓުކުރި އިއުލާނެއްގައި ބުނީ މި މަހުގެ 15 ވަނަ ދުވަހުން ފެށިގެން ޝައްވާލު މަހުގެ ފުރަތަމަ 7 ދުވަހާ ހަމައަށް މުދާ ވިއްކާ ތަންތަން ހުޅުވާފައި ބެހެއްޓޭނީ ފަތިހު 5:30 އިން މެންދަމު 1:00 އަށް ކަމަށެވެ.
އަދި ކެއިންބުއިމުގެ ހިދުމަތްދޭ ތަންތަން ރޯދަ މަހުގެ ރޭތަކުގައި ހުޅުވާފައި ބެހެއްޓޭނީ ހަވީރު 5:30 އިން މެންދަމު 3:00 އަށް ކަމަށް މިނިސްޓްރީން ބުނެފައިވެ އެވެ.
އިއުލާނުގައިވާ ގޮތުން ޝައްވާލު މަހުގެ ފުރަތަމަ 7 ދުވަހު ކެއިން ބުއިމުގެ ހިދުމަތްދޭ ތަންތަން ހުޅުވާފައި ބެހެއްޓޭނީ އެ ދުވަހެއްގެ ފަތިހު 4:30 އިން މެންދަމު 3:00 އާ ދެމެދު އެވެ.
ރާއްޖޭގައި މީހުން ދިރިއުޅޭ ހުރިހާ ރަށެއްގައި ވެސް އެ އުސޫލުން އަމަލު ކުރަން ޖެހޭނެ ކަމަށް އިކޮނޮމިކް މިނިސްޓްރީގެ އިއުލާނުގައިވެ އެވެ.
ކޮންމެ އަހަރެއްގެ ރޯދަ މަހާ ދިމާކޮށް ވެސް، މުދާ އުފުލޭނެ ގަޑިތަކާ އަދި ކެފޭ، ރެސްޓޯރެންޓްތަކާއި ފިހާރަތަކުން ހިދުމަތް ދެވޭނެ ގަޑިތައް ސަރުކާރުން ކަނޑައަޅަ އެވެ.
Ads by STO
