ތިބާއާ ބެހޭގޮތުން މީހަކު ބައެއްގެ ގާތުގައި ދޮގު ވާހަކަތަކެއް ދެއްކުމަކީ، އެބަޔަކު ތިބާ ދެކެ ރުޅިއައުމުގެ ސަބަބަކަށް ވެދާނެ!

ކޮންމެ މީހެއްގެ ވެސް ދިރިއުޅުން ވަށާލެވިފައި ވަނީ ޢާއިލާއާ އެކުވެރީންނާ އެކީގައެވެ. އަވަށްޓެރީންނާއި ދަންނަ މީހުންނާ އަދި ނުދަންނަ މީހުންނާ އެކީގައެވެ. މިފަދަ އެންމެންނާ ވެސް އެކި ކަންކަމުގައި މުޢާމަލާތްކޮށް އެކި މިންވަރަށް މުވާސަލާތު ކުރަން ޖެހެއެވެ.

ބައެއް މީހުންނަކީ އެހެން މީހުންނަށް ވަރަށް ހެޔޮ ވެފައި، އެމީހަކާއި ދޭތެރޭ ކޮންމެ މީހަކު ކޮންމެ ގޮތަކަށް ކަންތައް ކުރި ކަމުގައި ވިޔަސް އެމީހަކަށް ހިތްހެޔޮ ކަމާއިއެކީ ވާހަކަ ދައްކާ ކަންކަމުގައި އެހީތެރިވެދީ އުޅޭ މީހުންނެވެ،

ނަމަވެސް އަނެއް ބަޔަކީ ތިމާ އެމީހަކަށް ގޮތެއް ނުހެދިޔަސް، ދެރައެއް ނުދިނަސް، ބަދުބަހެއް ނުބުންޏަސް ތިމާ ދެކެ ރުޅިއައިސް އެމީހަކަށް ތިމާއަށް ދެވެން ހުރި ދެރައެއް ދެވުނު ގޮތަކަށް ދޭ މީހުންނެވެ.

ދުނިޔޭގައި އުޅޭއިރު އެއްބައެއްގެ ފަރާތުން ތިމާއަށް ލޯތްބާއި އަޅާލުން ލިބޭއިރު އަނެއް ބައެއްގެ ފަރާތުން ރުޅިވެރިކަމާއި ނަފްރަތު ވެސް ލިބެއެވެ. ބައެއް ފަހަރު އެފަދައިން ރުޅިވެރިކަން ލިބުމުގައި ތިމާގެ ކުށެއް ވެސް ހަގީގަތުގައި ނޯވެއެވެ.

ވަރަށް ގިނައިން ދިމާވާ ކަމެކެވެ. ތިމާއަށް ނުވެސް އެނގި، ތިމާ އެމީހަކަށް އެއްވެސް ކަމެއް ވެސް ނުކުރަނީސް ތިމާދެކެ ބައެއް މީހުން ރުޅި އައިސްފައި ތިބުމެވެ. ނުވަތަ ހިތްހަމަ ނުޖެހިފައި ތިބުމެވެ. އެފަދަ ބަޔަކަށް ތިމާ ފެނުނަސް ނުވަތަ ތިމާއާއި ގުޅޭކަމެއް ފެނުނަސް އިންތިހާއަށް ފޫހިވެ ރުޅި އަންނާނެއެވެ. ތިމާއަށް ނުވެސް އެނގި ހުރެއެވެ.

މިކަމުގެ ޙަގީގަތް ބަލާލާއިރު، ވެފައިމިވާ ގޮތަކީ ތިމާދެކެ ފޫހިވާ ނުވަތަ ތިމާއާއިމެދު ހަސަދަވެރިކަމެއް އޮންނަ އެހެން މީހަކު، އެބަޔަކު ކައިރީ ތިމާއޭ ކިޔައިގެން ފާޑުފާޑުގެ ދޮގު ވާހަކަތައް ދައްކާފައި ހުރުމެވެ. ތިމާ ދެކެ އަންނަ ރުޅިއެއްގެ ސަބަބުން އެމީހަކު އެހެން މީހުންގެ ކުރިމަތީގައި ވެސް ތިމާގެ އަގުވައްޓާ، ތިމާއަކީ ވަރަށް ވެސް ގޯސް މީހަކަށް ހަދަނީއެވެ. އޭނާ ތިމާދެކެ އަންނަ ރުޅީގައި އެހެން މީހުން ވެސް ޝާމިލު ކުރަނީއެވެ. ހަމައެކަނި ބޭނުމަކީ އެންމެން ވެސް ތިމާދެކެ ފޫހިވެ، އެކަނިވެރި ކޮށްލާ އެމީހަކާއެކު އެންމެންވެސް ވުމެވެ.

ހަސަދަވެރިކަމަކީ ވަރަށް ވެސް ނުބައި ކަމެކެވެ. މީހަކަށް ހަސަދަވެރި ވެއްޖެނަމަ އެކަމަކުން ސަލާމަތްވުމެއް ނެތޭ ވެސް ބައެއް މީހުން ބުނެއެވެ. ހަސަދަވެރި ކަމަކީ ގިނަ މީހުންގެ ހިތުގައި އެއިޙުސާސެއް އުފެދިއްޖެނަމަ މުޅި ހަށިގަނޑުތެރެއަށް އޭގެ ޒަހަރު ފެތުރި އެކަމުގެ ސަބަބުން ތިމާއާއި ދެން ތިބޭ ބަޔަކު ވެސް ހަލާކު ކޮށްލާ އެއްޗެކެވެ.

ވީމާ އެއްވެސް މީހަކާއިމެދު ހަސަދަވެރި ނުވެވޭތޯ ބަލާށެވެ. ނަމާދު ކުރާށެވެ. މާތް ﷲ އެންގެވި މަގުން އުޅެ، ވީހާވެސް ބޮޑަށް ދީނާއި އަޅުކަމާއި ގާތް ވާށެވެ. ޙަސަދަވެރީންނާއި ޢަދާވާތްތެރިންގެ ކިބައިން ތިބާ ދުރުކުރެއްވުމަށް އެދި އެކަލާނގެ ޙަޟްރަތުން ދުޢާ ކުރާށެވެ. އަދި އެފަދަ މީހެއް ކަމުގައި ތިބާ ވެސް ނުލެއްވުމަށް އެދި ދުޢާ ކުރާށެވެ.

މީގެއިތުރުން ބުނެލަން އޮތް ވާހަކައަކީ، ކޮންމެ ގުޅުމެއްގައި ވެސް "އިތުބާރަކީ" ވަރަށް މުހިންމު އެއްޗެއް ކަމެވެ. އެކަކު އަނެކަކަށް އިތުބާރު ނެތްނަމަ ގުޅުން ހީނަރު ވެގެން ދެއެވެ. މީހަކު ދައްކާހާ ވާހަކައެއް އެހާ ފަސޭހައިން ޤަބޫލުކޮށް ގޮތް ނިންމެނީ ވެސް އެހެން ވެގެންނެވެ. އެހެންކަމުން މީހުން ދައްކާހާ ވާހަކައެއް ޤަބޫލު ނުކޮށް ދެން ހުރި މީހާއަށް އިތުބާރު ކުރާށެވެ. އަދި ތިމާއަށް އަމިއްލައަށް އެކަމެއް ޔަގީންވުމުން ނޫނީ އެވާހަކަތައް ޤަބޫލުކޮށް، ގޮތް ނުނިންމާށެވެ.