ކޮވިޑްގެ ސަބަބުން އިންޑިއާ އާއި ރާއްޖެއަށް ލިބުނު ގެއްލުމުން އަރައިގަންނާނީ ގުޅިގެން: މޯދީ
ކޮވިޑްގެ ސަބަބުން އިންޑިއާ އާއި ރާއްޖެއަށް ލިބުނު ގެއްލުމުން އަރައިގަންނާނީ ގުޅިގެން ކަމަށް އިންޑިއާގެ ބޮޑުވަޒީރު، ނަރެންދްރަ މޯދީ ވިދާޅުވެއްޖެ އެވެ.
މޯދީ މިހެން ވިދާޅުވީ އިންޑިއާއިން ރާއްޖެއަށް 250 މިލިއަން ޑޮލަރު (3.9 ބިލިއަން ރުފިޔާ) ގެ ލޯނެއް ދިނުމާއި ގުޅިގެން އެޤައުމުގެ ސަރުކާރަށް ޝުކުރު އަދާކުރައްވައި ރައީސް ސޯލިހް ކުރެއްވި ޓްވީޓަކަށް ޖަވާބު ދެއްވަމުންނެވެ.
މޯދީ މިއަދު ކުރެއްވި ޓްވީޓެއްގައި ވިދާޅުވީ، އެކުވެރި އަދި އަވައްޓެރި ޤައުމެއްގެ ގޮތުގައި ރާއްޖެއާއި އިންޑިއާ އިން ކޮވިޑް-19 ގެ ސަބަބުން ދެޤައުމުގެ ސިއްޙީ ނިޒާމާއި އިޤްތިސާދަށް ލިބުނު ގެއްލުންތަކުން އަރައިގަންނާނީ، އެއްޤައުމުން އަނެއް ޤައުމަށް އެހީތެރިވެ، އެކުގައި ކަމަށެވެ.
ރައީސް އިބްރާހީމް މުޙައްމަދު ޞާލިޙް އިއްޔެ ކުރެއްވި ޓްވީޓުގައި ވިދާޅުވެފައި ވަނީ، ރާއްޖެއިން އެކުވެރިޔަކު ބޭނުންވާ ކޮންމެ ހިނދެއްގައި ވެސް އިންޑިއާ އޮންނަ ކަމަށެވެ. މިގޮތުން އެޤައުމުން ރާއްޖެއަށް ދިން 250 މިލިއަން ޑޮލަރުގެ އެހީތެރިކަމަކީ ގުޅުން އިތުރަށް ހަރުދަނާވެގެންދާނެ ކަމެއް ކަމަށް ވިދާޅުވެ، އެމަނިކުފާނު ވަނީ މޯދީ އަށާއި އިންޑިއާ ސަރުކާރަށް ޝުކުރު އަދާކުރައްވާފައެވެ.
އިންޑިއާއިން ރާއްޖެއަށް 250 މިލިއަން ޑޮލަރުގެ ލޯން ދިނީ ކޮވިޑް-19 ގެ ސަބަބުން ކުރިމަތިވި އިޤްތިސާދީ ދަތިކަމުން އަރައިގަތުމަށް ދިވެހި ސަރުކާރަށް ބަޖެޓު ސަޕޯޓުގެ ގޮތުގައެވެ.
