މުނައްވަރު، އީނާސް، އަހްމަދަަށް ދެނީ 15,000 ރުފިޔާގެ އެލަވަންސެއް
ހައްވާ ޔުމްނު ރަޝީދު ވެއްޓުނު މައްސަލައިގެ ހަގީގަތާ ހަމައަށް ވާސިލުވުމަށް ރައީސް މުހައްމަދު މުއިއްޒު އެކުލަވާލެއްވި ރިޔާސީ ކޮމިޝަނަށް އައްޔަންކުރި ތިން މެންބަރަކަށް ދެނީ 15,000 ރުފިޔާގެ އެލަވަންސެއް ކަމަށް މުއިއްޒު ވިދާޅުވެއްޖެ އެވެ.
މިއަދު ހެނދުނު 10 ޖެހިއްސުރެން ފެށިގެން އަދިވެސް ކުރިއަށްދާ ނޫސްވެރިންގެ ބައްދަލުވުމުގައި ނޫސްވެރިއަކު ސުވާލުކުރުމުން ކޮމިޝަންގައި މަސައްކަތްކުރާ ޑރ. މޫސާ މުރާދާއި، ޖަބީން މުހައްމަދުގެ ވަޒީފާއިން ވީއްލާފައިވާ ކަމަށެވެ.
މުރާދު މަސައްކަތް ކުރަނީ އައިޖީއެމްއެޗްގަ އެވެ. ޖަބީނަކީ ހުޅުމާލެ ހޮސްޕިޓަލްގެ ސީނިއާ ނަރުހެކެވެ. ވަޒީފާއިން ވީއްލި ނަމަވެސް ކުރިން ދެމުންދާ މުސާރަ ދޭނެ ކަމަށް ރައީސް ވިދާޅުވި އެވެ.
ދެން ކޮމިޝަނުގައި ތިއްބެވީ ސަރުކާރުގެ ވަޒީފާ ނެތް ބޭފުޅުންނެވެ. ކޮމިޝަންގެ ރައީސް، ކުރީގެ ބަންޑާރަނައިބު ޑރ. މުހައްމަދު މުނައްވަރު އާއި އެޗްއާރުސީއެމްގެ ކުރީގެ ރައީސް އާމިނަތު އީނާސް އާއި ބްރިގޭޑިއާ ޖެނެރަލް ރިޓަޔާޑް އަހްމަދު މުހައްމަދެވެ.
ރައީސް މުއިއްޒު ވިދާޅުވި ގޮތުގައި އެ ބޭފުޅުންނަށް ދެއްވަނީ 15,000 ރުފިޔާގެ އެލަވަންސެކެވެ.
ނަމަވެސް އެއީ ޖުމުލަ އުޖޫރަ ކަމެއް އަދި ކޮންމެ މަހަކު ދެއްވާ މުސާރަ ކަމެއް ސާފެއް ނޫނެވެ.
ރައީސް ވިދާޅުވީ ކޮމިޝަނަށް ވަކި ހާއްސަ ބަޖެޓެއް ނެތް ކަމަށެވެ. ނަމަވެސް ކޮމިޝަނުން އެދޭ ކޮންމެ ކަމެއް ވެސް ހަމަޖައްސާނެ ކަމަށް އެމަނިކުފާނު ވިދާޅުވި އެވެ.
