ކޮވިޑް-19: ރާއްޖެއިން ފައްސިވީ މީހުންގެ އަދަދު ދިހަހާހުން މައްޗަށް
ރާއްޖެއިން ކޮވިޑް-19 އަށް ފައްސިވީ މީހުންގެ ޖުމްލަ އަދަދު 10،000 ން މައްޗަށް އަރައިފިއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިއްޔެގެ 18:00ން މިއަދުގެ 18:00 ނެރެފައިވާ ސަރވޭލެންސް ޑޭޓާއަށް ބަލާއިރު މިހާރު ރާއްޖެއިން ޖުމްލަ 10،014 މީހުން ވަނީ ކޮވިޑަށް ފައްސި ވެފައެވެ.
މިމުއްދަތުގައި އިތުުރު 75 މީހަކު ބައްޔަށް ފައްސި ވެފައިވާއިރު، އިތުރު 76 މީހަކު ވަނީ ކޮވިޑް ބަލިން ފަސޭހަ ވެސް ވެފައެވެ.
ކޯވިޑް-19 ކޮންޓްރޯލްކުރުމަށް މިހާރު އަޅާފައިވާ ފިޔަވަޅުތަކާއެކު ބަލިޖެހޭ މީހުންގެ ޢަދަދު ކޮންމެވެސް ވަރަކަށް މަދުކުރެވިފައިވީ ނަމަވެސް ރައްކާތެރި މިންގަނޑެއްގެ ގޮތުގައި ބަލާ ގުޅުންނެތް ކޭސްތައް %20 އަށްވުރެ އަދި ދަށްވެފައި ނުވާކަމަށް ރޭ ބޭއްވި ނޫސްވެރިންގެ ބައްދަލުވުމުގައި ޑރ. ޝީނާ ވަނީ ވިދާޅުވެފައެވެ.
މީގެއިތުރުން ޑރ. ޝީނާ ވިދާޅުވީ ބަލިފެތުރުން ބޮޑުތަނުން މަދުކުރެވޭނީ ހުރިހާ އެންމެން ވެސް ރައްކާތެރިކަމުގެ ފިޔަވަޅުތަކަށް ބޯ ލަނބައިގެން ކަމަށާ، ބަލީގެ ޙާލަތު ބަދަލުވަމުންދާ މިންގަނޑަށް ބަލާއިރު، އަދިވެސް ގްރީން ޒޯނަށް ނުދާކަމަށެވެ. އަދި އާއްމު ހާލަތަކަށް ދެވޭނީ ވެކްސިނެއް ލިބުމުން ކަމަށް ވެސް ޑރ. ޝީނާ ވިދާޅުވެފައިވެއެވެ.
