ހުޅުމާލެ ޕޮލިސްގެ ވެރިޔާ މަސްއޫލިއްޔަތުތަކުން ދާއޫދު ދުރުކޮށްފި
ހުޅުމާޅެ ޕޮލިސްގެ އެންމެ އިސްވެރިޔާގެ މަގާމުގައި ހުންނެވި އެސިސްޓެންޓް ޕޮލިސް ކޮމިޝަނަރު މުހައްމަދު ދާއޫދު މަގާމުގެ މަސްއޫލިއްޔަތުތަކުން ދުރުކޮށްފި އެވެ.
ދާއޫދުގެ ކޮރަޕްޝަންގެ ބޮޑެތި މައްސަލަތަކެއް މިދިޔަ މަހުގެ މެދު ތެރޭ ހިލުނީ ފުލުހުންގެ ވެލްފެއާ ކުންފުނި ޕޮލްކޯއިން ހިންގި ބްލޫ ހައުސިންގެ މަޝްރޫއާ ގުޅޭ އޮޑިޓް ރިޕޯޓާ ގުޅޭ މައްސަލަ ބަލަން ހެދި ސަބް ކޮމިޓީގެ މިއަދު ބައްދަލުވުމުގައި މަޖިލީހުގެ ނައިބު ރައީސް އަހުމަދު ނާޒިމް އެކަން ފާހަގަކުރެއްވުމުންނެވެ.
އަދި އެ މައްސަލަ ހިލުނުތަނާ ދާއުދު 14 ދުވަހުގެ ޗުއްޓީއެއް ނެންގެވުމުން ހުޅުމާލެ ޕޮލިސް ހިންގުން އެސިސްޓެންޓް ކޮމިޝަނަރު އަހުމަދު މުހައްމަދު (ޓޫފޯ) އާ ވަގުތީ ގޮތުން އޮތީ ހަވާލުކޮށްފަ އެވެ.
ދާއޫދުގެ ޗުއްޓީ ހަމަވެފައިވާ އިރު ފުލުހުން ބުނީ އޭނާ މިހާރު ހުޅުމާލެ ޕޮލިސްގެ ވެރިޔާގެ މަސްއޫލިއްޔަތުތަކުން ދުރުކޮށްފައިވާ ކަމަށެވެ. އަދި އެ މަގާމަށް ޓޫފޯ އަނެއްކާވެސް ހަމަޖައްސާފައިވާ ކަމަށް ވެސް ބުންޏެވެ.
ކުރިން ފުލުހުންގެ ޗީފް ސުޕްރިންޓެންޑެންޓްގެ މަގާމުގައި ހުންނެވި ދާއޫދު އެސިސްޓެންޓް ކޮމިޝަނަރުގެ މަގާމަށް ޕްރޮމޯޓްކުރީ މިދިޔަ އަހަރުގެ ސެޕްޓެމްބަރު މަހު އެވެ.
ކުރިން 2021 ވަނަ އަހަރު ޕޮލިސް ބޯޑުގެ ލަފާގެ މަތިން ވަކިކުރަން ނިންމި އޮފިސަރުންގެ ތެރޭގައި ވެސް ދާއުދު ހިމެނުނެވެ. ނަމަވެސް ފަހުން ސިވިލް ކޯޓަށް އެ މައްސަލަ ހުށަހެޅުމުން ވަނީ އެ ނިންމުމަށް އަމަލުކުރަން ހުއްޓުވައި އަދި ބޯޑުގެ ނިންމުންވެސް ބާތިލުކުރުމާއެކު އޭނާގެ ވަޒީފާ ނުގެއްލި އޮތީ އެވެ
