ޚަބަރު

ނޮވެމްބަރު 17ގައި އެމްޑީޕީން މުޒާހަރާއެއް ނުކުރާނެ

މުޙައްމަދު ޝިޔާމް ، ދެން އޮންލައިން
އެމްޑީޕީން ބޭއްވި އެއްވުމެއް: މޭޑޭގައި ބޮޑު އެއްވުމެއް ބޭއްވުމަށް ވަނީ ނިންމާފައި / ފޮޓޯ:ދެން އިމޭޖްސް

ރައީސް ޑރ. މުހައްމަދު މުއިއްޒުގެ ސަރުކާރަށް ދެ އަހަރު ފުރުމާ ދިމާކޮށް, މި މަހުގެ 17ވަނަ ދުވަހު އިދިކޮޅު އެމްޑީޕީން ކުރަން އުޅުނު މުޒާހަރާ ކެންސަލްކޮށްފިއެވެ.

Ads by MPL

އެ ގޮތަށް ނިންމީ އެމްޑީޕީން މިރޭ ކުރިއަށް ގެންދިޔަ އެ ޕާޓީގެ ގައުމީ މަޖިލީހުގެ ބައްދަލުވުމުގ އެވެ.

އެމްޑީޕީން ވަނީ މިދިޔަ އޮކްޓޯބަރު މަހުގެ ތިންވަނަ ދުވަހު ބޮޑު މުޒާހަރާއެއް ކޮށްފައެވެ. އެތައް ސަތޭކަ މީހުން އެއްވި އެ މުޒާހަރާއަށް ފުލުހުން ހުރަސްއެޅިއެވެ. އެއީ ފުލުހުން ދިން އިރުޝާދާ ހިލާފަށް މުޒާހަރާގެ ބައިވެރިން އަމީނީމަގުގެ ބަދަލުގައި މަޖީދީ މަގުން ދާން އުޅުމުންނެވެ.

އެ މުޒާހަރާއިން އަށް މީހަކު ހައްޔަރުކޮށް އެއިން ހަ މީހަކު 15 ދުވަހު ޖަލުގައި ބަންދުކުރިއެވެ. އެ މީހުންގެ ތެރޭގައި މާފުށި ކައުންސިލްގެ ރައީސް ހަސަން ސޮލާހް، ދާންދޫ ދާއިރާގެ ކުރީގެ މަޖިލިސް މެންބަރު ޔައުގޫބް އަބްދުﷲއާއި، ކުޅުދުއްފުށީ އުތުރު ދާއިރާގެ ކުރީގެ މަޖިލިސް މެންބަރު ޔާސިރު އަބްދުއްލަތީފް ހިމެނެއެވެ.

އެމްޑީޕީގެ މުޒާހަރާ ކެންސަލްކުރިއިރު، ސަރުކާރު ހިންގާ ޕީއެންސީން ގެންދަނީ އަންނަ ހުކުރު ދުވަހު، ނޮވެމްބަރު 14އަށް ބޮޑު ޖަލްސާއެއް ބޭއްވުމަށް ތައްޔާރުވަމުންނެވެ.

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!