ރެކޯޑު މުގުރާލައި، މިއަހަރުގެ ދެ މިލިއަން ވަނަ ޓޫރިސްޓު އަތުވެއްޖެ

ރާއްޖެއަށް މިއަހަރުގެ ދެ މިލިއަން ވަނަ ޓޫރިސްޓު އަތުވެއްޖެ އެވެ.

ޓޫރިޒަމް މިނިސްޓްރީން މިއަހަރަށް ކަނޑައަޅާފައިވާ ޓާގެޓަކީ 2.2 މިލިއަން ޓޫރިސްޓުން އަންނާނެ ކަމަށެވެ. ނަމަވެސް މިދިޔަ އަހަރު ދެ މިލިއަން ޓޫރިސްޓުން ހަމަވި ތާރީހުގެ މަސް ދުވަސް ކުރިން މިވަނީ ދެ މިލިއަން ޓޫރިސްޓުން ރާއްޖެ ޒިޔާރަތްކޮށްފަ އެވެ.

އެގޮތުން މިދިޔަ އަހަރު ދެ މިލިއަން ވަނަ ޓޫރިސްޓު ރާއްޖެ އައިސްފައި ވަނީ ޑިސެމްބަރު 26 ވަނަ ދުވަހު އެވެ. މިއަހަރު ޓޫރިސްޓުން އައި މިންވަރަށް ބަލާއިރު، މި މަސް ނިމުމުގެ ކުރިން ދެ މިލިއަން ހަމަވާނެ ކަމަށް ކުރިން ވެސް އޮތީ އަންދާޒާ ކޮށްފަ އެވެ.

ދެ މިލިއަން ވަނަ ޓޫރިސްޓަކަށް މިއަދު ރާއްޖެ އައިސްފައި ވަނީ ބެތެނީ ސެރާ ކާސްވެލް ކިޔާ އިނގިރޭސިވިލާތުގެ އަންހެނެކެވެ. މިނިސްޓްރީން ވަނީ ވެލާނާ އިންޓަނޭޝަނަލް އެއާޕޯޓުގައި އޭނާ ރާއްޖެ އައުން ކުލަ ގަދަކޮށް ފާހަގަކޮށްފަ އެވެ.

މިއަހަރަކީ ވޭތުވެ ދިޔަ ފަސް އަހަރަށް ބަލާއިރު ވެސް އެންމެ ގިނަ ޓޫރިސްޓުން ޒިޔާރަތް ކުރާނެ އަހަރެވެ. އެގޮތުން މިދިޔަ އަހަރުގެ ނިޔަލަށް ދެ މިލިއަން ޓޫރިސްޓުން ޒިޔާރަތްކޮށްފައިވާއިރު، 2023 ގައި ރާއްޖެ އައިސްފައި ވަނީ 1.8 މިލިއަން ޓޫރިސްޓުންނެވެ.

ޓޫރިސދްޓުން ރާއްޖެ އަންނަ މިންވަރު އިތުރުވަމުންދާއިރު، ލިބޭ އާމްދަނީ ވެސް ދަނީ އިތުރުވަމުންނެވެ. އެގޮތުން 2019 ވަނަ އަހަރު ޓޫރިޒަމަށް 3.9 ބިލިއަން ޑޮލަރު ލިބިފައިވާއިރު، މިދިޔަ އަހަރު އެ އަދަދު ވަނީ 4.8 ބިލިއަން ޑޮލަރަށް އިތުރުވެފަ އެވެ.