ވެލިދޫ އާއި ހޮޅުދޫގެ ސިއްހީ މަރުކަޒުގައި އެކްސްރޭގެ ހިދުމަތް ފަށައިފި
ނ. ވެލިދޫ އަދި އެ އަތޮޅުގެ ހޮޅުދޫގައި ހުންނަ ސިއްހީ މަރުކަޒުގައި އެކްސްރޭގެ ހިދުމަތް މިއަދު ފަށައިފި އެވެ.
މިއަދު އެ ދެ ރަށުގެ ސިއްހީ މަރުކަޒުގައި ބޭއްވި ހާއްސަ ރަސްމިއްޔާތެއްގައި އެކްސްރޭގެ ހިދުމަތް ފައްޓަވައިދެއްވީ ހެލްތު މިނިސްޓަރު އަބްދުﷲ ނާޒިމް އެވެ.
ނ. އަތޮޅަށް ހެލްތު މިނިސްޓަރު ކުރައްވަމުން ގެންދަވާ ދަތުރުފުޅުގައި އޭނާ ވަނީ ނ. އަތޮޅުގެ މަނަދޫގައި ހުންނަ އަތޮޅު ހޮސްޕިޓަލުގައި ގާއިމުކުރި އައިސީޔޫގެ ހިދުމަތް ވެސް މިއަދު އިފްތިތާހުކޮށްދެއްވައިފަ އެވެ.
އޭގެ އިތުރުން ނ. ލަންދޫގައި ހުންނަ ސިއްހީ މަރުކަޒު ވަނީ 24 ގަޑިއިރަށްވެސް ބަދަލުކޮށްފަ އެވެ.
މިނިސްޓަރުގެ ދަތުރުފުޅުގައި ވަނީ ނ.އަތޮޅުގެ މުވައްޒަުންނާއި ބައްދަލުކުރައްވާ މިހާރު އެ އަތޮޅުގައިދެމުންގެންދާ ހިދުމަތްތައް އިތުރަށް ފުޅާކޮށް، ހިދުމަތް ދިނުމުގައި ދިމާވާ ދަތިތައް ހައްލުކުރުމާގުޅޭގޮތުން ވެސް މަޝްވަރާކުރައްވައިފަ އެވެ.
އަތޮޅުތަކުގެ ސިއްހީ ނިޒާމު ރަނގަޅުކުރުމުގެ ގޮތުން ސަރުކާރުން ދަނީ ބައެއް ރަށްރަށުގެ ސިއްހީ މަރުކަޒުތައް ޓާޝިއަރީ ހޮސްޕިޓަލު ފެންވަރަށް ތަަރައްގީކުރަމުން ނެވެ. އަދި ބައެއް ރަށްތަކުގައި ހިދުމަތްތައް ދަނީ އިތުރަށް ފުޅާވެސްކުރަމުން ނެވެ.
