ބެލްޖިއަމްގެ ރަސްގެފާނަށް ސަފީރު ދިޔާނާ، ސަފީރުކަމުގެ ފަތްކޮޅު އަރުވައިފި
ބެލްޖިއަމްގެ ރަސްގެފާނު ކިންގް ފިލިޕްއަށް، ދިވެހިރާއްޖެއިން އެ ގައުމަށް ކަނޑައެޅުއްވި އާ ސަފީރު ފާޠިމަތު ދިޔާނާ ސަޢީދު ސަފީރުކަމުގެ ފަތްކޮޅު އަރުވައިފިއެވެ.
ދިވެހިރާއްޖެއިން ކިންގްޑަމް އޮފް ބެލްޖިއަމަށް ކަނޑައެޅުއްވި އާ ސަފީރު ފާޠިމަތު ދިޔާނާ ސަޢީދު، އެ ގައުމުގެ ރަސްގެފާނު ކިންގް ފިލިޕްއަށް ސަފީރުކަމުގެ ފަތްކޮޅު އަރުވައިފިއެވެ.
މި ރަސްމިއްޔާތު ބާއްވާފައިވަނީ ބްރަސަލްސްގައި ހުންނަ ޝާހީ ގަނޑުވަރު "ޕަލޭ ރޯޔާލް" ގައެވެ.
ފަތްކޮޅު އެރުވުމަށް ފަހު ބޭއްވި ބައްދަލުކުރެއްވުމުގައި، ސަފީރު ދިޔާނާ ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ދިވެހި ރައްޔިތުންގެ ނަމުގައި ރަސްގެފާނަށާއި ބެލްޖިއަމްގެ ރައްޔިތުންނަށް ހެޔޮއެދުންތައް ރައްދުކުރައްވާފައެވެ. އަދި ދެ ގައުމުގެ ދެމެދުގައި އޮތް ގުޅުން އިތުރަށް ހަރުދަނާކުރުމަށް ރާއްޖެއިން މަސައްކަތްކުރާނެ ކަމުގެ ޔަގީންކަން ދެއްވިއެވެ.
މި ބައްދަލުވުމުގައި ބެލްޖިއަމްގެ ރަސްގެފާނު ވަނީ ސަފީރު ދިޔާނާއަށް މަރުހަބާ ވިދާޅުވެ، ދެ ގައުމުގެ ގުޅުން އިތުރަށް ބަދަހިކުރުމުގައި ބެލްޖިއަމް ސަރުކާރުގެ ފުރިހަމަ އެއްބާރުލުން ލިބޭނެ ކަމަށް ވިދާޅުވެފައެވެ. މި ރަސްމިއްޔާތުގައި ސަފީރުގެ އަރިހުގައި، ބްރަސަލްސްގައި ހުންނަ ރާއްޖޭގެ އެމްބަސީގެ ކައުންސެލަރ ޢާއިޝަތު ޝަހުލާއާއި ސެކްރެޓަރީ ޙަސަން ނަވާފް ބައިވެރިވެވަޑައިގެންނެވިއެވެ.
ސަފީރު ފާޠިމަތު ދިޔާނާ ސަޢީދަކީ ދައުލަތުގެ އިސް ގިނަ މަގާމުތަކެއް ފުރުއްވާފައިވާ ތަޖުރިބާކާރު ބޭފުޅެކެވެ. އެކަމަނާ ވަނީ މީގެ ކުރިން ސާކްގެ ސެކްރެޓަރީ ޖެނެރަލްކަމާއި، ބަންޑާރަނައިބުކަމާއި، ޖެންޑަރ މިނިސްޓަރުކަމުގެ އިތުރުން ރައްޔިތުންގެ މަޖިލީހުގެ މެންބަރުކަން ވެސް ކުރައްވާފައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.