މެންބަރު މައުރޫފްގެ ބަންދަށް ފަސް ދުވަސް ޖަހައިފި
މަސްވެރިންގެ ދުވަހާ ދިމާކޮށް ބޮޑުކަންނެލި މަސްވެރިކަން ކުރާ ފަރާތްތަކުން މަސް ދޯނިތަކުގެ ކުރި މުޒާހަރާގެ ތެރެއިން ހައްޔަރުކުރި ކެންދޫ ދާއިރާގެ މެންބަރު މައުރޫފް ޒާކިރުގެ ބަންދުގެ މުއްދަތު ޖަހައިފިއެވެ.
މިދިޔަ ބުދަ ދުވަހުން ފެށިގެން ކުރަމުން ދިޔަ މުޒާހަރާ ފުލުހުން ރޫޅާލީ އިއްޔެއެވެ. އަދި އެ މުޒާހަރާ ރޫޅާލުމުގެ ތެރޭގައި މުޒާހަރާގެ އިސްބޭފުޅުން ތަކަކާ އެކު މައުރޫފް ވެސް ހައްޔަރުކުރިއެވެ.
އެ މައްސަލައާ ގުޅިގެން މައުރޫފްގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް މިއަދު ވަނީ ހާޒިރުވެސްކޮށްފައެވެ. އަދި ކޯޓުން ވަނީ މައުރޫފްގެ ބަންދަށް ފަސް ދުވަސް ޖަހައިފައެވެ.
މައުރޫފްއަކީ މަސްވެރިންގެ ޔޫނިއަންގެ ޖެނެރަލް ސެކެޓްރީ ވެސް މެއެވެ.
މައުރޫފް ހައްޔަރުކުރުމާ ގުޅިގެން، އޭނާ ދޫކޮށްލަން އެމްޑީޕީން ވަނީ ގޮވާލާފައިއެވެ. އަދި މައުރޫފާއި މަސްވެރިންގެ އިހްތިޖާޖުން ހައްޔަރު ކޮށްފައިވާ އިތުރު މީހުންގެ ބަންދުގެ މުއްދަތު އިތުރު ކުރުމާއި ދެކޮޅަށް ކްރިމިނަލް ކޯޓު ކައިރީގައި އެމްޑީޕީން ވަނީ ސުލްހަވެރިކަމާއެކު އިހުތިޖާޖު ކޮށްފައެވެ.
މީގެ އިތުރުން މައުރޫފް ހައްޔަރުކުރި މައްސަލަ އެމްޑީޕީން ވަނީ އިންޓަ ޕާލިމެންޓަރީ ޔޫނިއަން (އައިޕީޔޫ)އަށް ވެސް ހުށަހަޅައިފައިއެވެ.
Ads by STO
