ރާއްޖޭގެ ކޯޓަކުން ކުރި އެންމެ ދިގު ޖަލު ޙުކުމް މަންޑޭގެ މައްޗަށް
ހުޅުމާލޭގައި ތަރައްޤީ ކުރަމުންދާ ކޭ-ޕާކު ރެޒިޑެންސްގެ ފްލެޓުތަކުގެ މައްސަލައިގައި ޙަސަން މަމްދޫޙު (މަންޑޭ) މައްޗަށް އުފުލައިފައިވާ ދައުވާތައް ސާބިތުވެފައި ވާތީ އޭނާގެ މައްޗަށް 397 އަހަރުގެ ޖަލު ހުކުމެއްކޮށްފިއެވެ.
މަމްދޫޙުގެ އިތުރުން އޭނާގެ ބައިވެރިން، ހަންބޯ ކޮމްޕެނީ ޕްރައިވެޓް ލިމިޓެޑުގެ މެޖޯރިޓީ ހިއްސާދާރުކަމުގައިވާ ޗައިނާ، ޖިން ޝިހޫ، ގެ ސޮއި ފޯޖުކޮށްގެން ލިޔެކިޔުންތަކެއް ހަދައިގެން ބޭންކް އޮފް މޯލްޑިވްސްގައި އެ ކުންފުނީގެ ނަމުގައި ބޭންކް އެކައުންޓް ހުޅުވައި ހަންބޯގެ ފަރާތުން ކޭ-ޕާކް ރެސިޑެންސްގެ ނަމުގައި ހުޅުމާލޭގައި ތަރައްޤީކުރަމުންދާ އިމާރާތުގެ އެޕާޓްމަންޓްތައް އޮޅުވާލައިގެން މަކަރާއި ޙީލަތުން ޢާއްމު ފަރާތްތަކަށް ވިއްކައި ބައެއް އެޕާޓްމަންޓްތައް އެއް ފަރާތަށް ވުރެ ގިނަ ފަރާތަށް ވިއްކައި އެ ފައިސާއަށް ޚިޔާނާތްތެރިވެ، އެ ފައިސާ ލޯންޑާކޮށްފައިވާ ކަމަށް ތުޙުމަތުކުރެވޭ މައްސަލައިގައި 94 ދަޢުވާއެއް އުފުލިއެވެ.
މި މައްސަލައާ ގުޅިގެން ކްރިމިނަލް ކޯޓުގައި މިދިޔަ ހޮނިހިރު ދުވަހު ބޭއްވި އަޑުއެހުމުގައި މަމްދޫހުގެ މައްޗަށް އުފުލައިފައިވާ ދަޢުވާތައް ވަނީ ސާބިތުވެފައެވެ. އެގޮތުން މަމްދޫހުގެ މައްޗަށް ޓެކުމުގެ 46 ދަޢުވާއާއި، އޮޅުވައިލުމުގެ އަމަލެއް ކުރުމުގެ 44 ދަޢުވާއާއި، މީހަކަށް ކަމެއް އޮޅުވައިލުމުގެ ނިޔަތުގައި އެނގިހުރެ ޞައްޙަނޫން ލިޔުމެއް ދިނުމުގެ 3 ދަޢުވާ އަދި މަނީ ލޯންޑްރިންގެ 1 ދަޢުވާ ވަނީ ސާބިތުވެފައެވެ.
ކޯޓުން މިއަދު ކުރި ހުކުމުގައި ވަނީ މަމްދޫހުގެ މައްޗަށް ސާބިތުވި ޓެކުމުގެ ކޮންމެ ދައުވާއަކަށް 8 އަހަރު ހިމެނޭހެން ޖުމްލަ 368 އަހަރުގެ ހުކުމެއް އިއްވައިފައެވެ. އަދި އޮޅުވައިލުމުގެ އަމަލެއް ކުރުމުގެ ކުށުގައި 14 އަހަރުގެ ހުކުމެއް އިއްވާފައިވާއިރު މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ޞައްޙަ ނޫން ލިޔުމެއް ދިނުމުގެ ކުށުގައި ދޮޅު އަހަރުގެ ޖަލު ހުކުމެއް އަދި މަނީ ލޯންޑަރިންގެ ކުށުގައި 15 އަހަރުގެ ޖަލުހުކުމެއް ވެސް ވަނީ އިއްވައިފައެވެ.
މީގެ އިތުރުން މަނީ ލޯންޑަރިންގެ ކުށުގައި މަމްދޫހުގެ މައްޗަށް 30 މިލިއަން ރުފިޔާއިން ޖޫރިމަނާ ކުރުމާ އެކު، ހުޅުމާލެއިން އޭނާ ގަނެފައިވާ ޕެންޓްހައުސް ދައުލަތަށް ނެގުމަށް ވެސް ކޯޓުން ވަނީ އަމުރުކޮށްފައެވެ.
