ގިރާވަރުފަޅު ހިއްކުމުގެ ޢަމަލީ މަސައްކަތް ފަށައިފި
މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ޙައްލު ހޯދައިދިނުމަށް، ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ގިރާވަރުފަޅު ހިއްކުމުގެ ޢަމަލީ މަސައްކަތް ފަށައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކްސްގައި ހިއްސާ ކުރެއްވި ޕޯސްޓެއްގައި ވިދާޅުވީ، ގިރާވަރުފަޅު ހިއްކުމުގެ ޢަމަލީ މަސައްކަތް މިއަދު ހެނދުނު ފަށާފައިވާ ކަމަށެވެ. އަދި މި މަޝްރޫޢުއަކީ މާލެ ސަރަޙައްދުގައި ކުރިއަށް ގެންދާ ބިންހިއްކުމުގެ މަޝްރޫޢުތަކުގެ ތެރެއިން އެންމެ އަވަސް މުއްދަތެއްގައި ނިންމާލެވޭނެ މަޝްރޫޢުކަމަށް އެ މަނިކުފާނު ވަނީ ވިދާޅުވެފައެވެ.
ސަރުކާރުން މި މަސައްކަތް ކުރުމަށް ހަވާލުކޮށްފައި ވަނީ ބޮސްކާލިސް ކުންފުންޏާއެވެ. މި ފަޅުން 56ހެކްޓަރުގެ ބިން ހިއްކާ ނިމިފައިވާ ކަމަށް ސަރުކާރުން ވަނީ ހާމަކޮށްފައެވެ. އަދި މި ފެށުނު މަޝްރޫޢުގައި ގިރާވަރުފަޅުން 169ހެކްޓަރުގެ ބިމެއް ހިއްކިގެންދާނެ ކަމަށް ސަރުކާރުން ބުނެއެވެ.
މި މަހުގެ 22ވަނަ ދުވަހު ސަރުކާރުން ވަނީ ގިރާވަރުފަޅުގެ އައު ލޭންޑް ޔޫސް ޕްލޭން އާންމުކޮށްފައެވެ. އެ ލޭންޑް ޔޫސް ޕްލޭނަށް ބަދަލު ގެނައުމާ ގުޅިގެން އެފަޅުން ގޯތި ލިބުނު މީހުންގެ މެދުގައި އަލުން ގުރު ނެގުމަށް ސަރުކާރުން ވަނީ ނިންމާފައެވެ. ގިރާވަރުފަޅުން ޖުމުލަ 4ސައިޒެއްގެ 4072ގޯތި ދޫކުރުމަށް ވެސް ވަނީ ހަމަޖެހިފައެވެ.
ގިރާވަރުފަޅުން ދޫކުރާ ގޯތީގެ އަދަދާއި ބޮޑުމިން:
- 1250 އަކަފޫޓުގެ 2603 ގޯތި
- 1650 އަކަފޫޓުގެ 1214 ގޯތި
- 2050 އަކަފޫޓޫގެ 254 ގޯތި
- 2450 އަކަފޫޓުގެ 1 ގޯތި
މި މިޝްރޫޢު ވީހާވެސް އަވަސް ސްޕީޑެއްގައި ނިންމައި، ބޯހިޔާވަހިކަމުގެ ފުރުސަތު ރައްޔިތުންނަށް ހޯދައިދިނުމުގެ މަސައްކަތް ކުރަމުން ގެންދާނެ ކަމަށް ސަރުކާރުން ބުނެއެވެ.
Ads by STO
