މާލޭގެ ބާޒާރުގައި ފިޔާގެ އަގު އުފުލިއްޖެ، އެސްޓީއޯގައި ސްޓޮކް އެބަހުރި
މާލޭގެ އާންމު ބާޒާރުގައި ވިއްކާ ފިޔާގެ އަގު މި ދުވަސްވަރު ކުއްލިއަކަށް ބޮޑުވެފައިވީ ނަމަވެސް، ދައުލަތުގެ މައި ވިޔަފާރި ކުންފުނި ކަމަށްވާ އެސްޓީއޯއިން ފިޔާ އެތެރެކޮށް އާންމުންނަށް ފޯރުކޮށްދިނުމުގައި އެއްވެސް ދަތިކަމެއް ނެތްކަމުގެ ޔަޤީންކަން އެ ކުންފުނިން ދީފިއެވެ.
މާލޭގެ ފިހާރަތަކުގައި ކުރިން 8ރ. އަށް ލިބެން ހުރި ފިޔާ ކިލޯއެއްގެ އަގު މިހާރު އުޅެނީ 25ރ. އަށެވެ. އާންމު ވިޔަފާރިވެރިން ފިޔާ ވިއްކާ އަގު އުފުލުމާ ގުޅިގެން ގިނަ ރައްޔިތުންތަކެއް ދަނީ ކަންބޮޑުވުން ފާޅުކުރަމުންނެވެ. އެހެންނަމަވެސް، ރާއްޖެއަށް އެންމެ ފުޅާ ދާއިރާއެއްގައި ކާބޯތަކެތި އެތެރެކުރާ މައި ކުންފުނީގެ ގުދަންތަކުގައި އާންމުންނަށް ދަތިނުވާނެ މިންވަރަށް ފިޔާގެ ސްޓޮކް އެބަހުއްޓެވެ. މީގެ ސަބަބުން، މާކެޓުގައި އުފެދިފައިވާ އަގުގެ އުފުލުން ކޮންޓްރޯލް ކުރުމަށް މަގުފަހިވެގެންދާނެ ކަމަށް ބެލެވެއެވެ.
އަސާސީ ކާބޯތަކެތީގެ އަގުތައް އެއްވަރެއްގައި ހިފެހެއްޓުމަށްޓަކައި އެސްޓީއޯއިން އަންނަނީ މެދުކެނޑުމެއްނެތި ގިނަ މަސައްކަތްތަކެއް ކުރަމުންނެވެ. އެގޮތުން، މީގެ ކުރިންވެސް ބާޒާރުގައި އަލުވި، ބިސް އަދި ފިޔާ ފަދަ ބާވަތްތަކުގެ އަގު އިންތިހާއަށް އުފުލިގެން ދިޔަ ދަނޑިވަޅުތަކުގައި، އެ ކުންފުނިން ވަނީ ހެޔޮ އަގުގައި މި ބާވަތްތައް ބާޒާރަށް ނެރެފައެވެ. އަދި އެކި މުނާސަބަތުތަކާ ގުޅުވައިގެން، އެސްޓީއޯ ޖެނެރަލް ޓްރޭޑިންގ މެދުވެރިކޮށް ޚާއްޞަ ޕްރޮމޯޝަންތައްވެސް ހެޔޮ އަގުގައި އާންމު ރައްޔިތުންނަށް ފޯރުކޮށްދީފައިވާކަން ފާހަގަކޮށްލެވެއެވެ.
