އާޒިމާގެ މައްޗަށް އުފުލާފައިވާ ދައުވާ ތަކުގެ ޝަރީއަތުގެ އަޑުއެހުމެއް އާދީއްތަ ދުވަހު!
ކުރީގެ ރައީސް އަބްދުالله ޔާމީން އަބްދުލްޤައްޔޫމުގެ ވެރިކަމުގައި، ރައީސް އޮފީހުގައި ލީގަލް އެފެއާޒް މިނިސްޓަރުކަން ކުރެއްވި އައިޝަތު އާޒިމާ ޝަކޫރުގެ މައްޗަށް ކޮށްފައިވާ ދައުވާތަކުގެ ޝަރީއަތުގެ އަޑުއެހުމެއް އާދިއްތަ ދުވަހު ބޭއްވުމަށް ތާވަލް ކޮށްފިއެވެ.
ކްރިމިނަލް ކޯޓުގެ އާދީއްތަ ދުވަހުގެ ތާވަލުގައިވާ ގޮތުން އާޒިމާގެ ޝަރީއަތުގެ އަޑުއެހުން އޮންނާނީ އެ ދުވަހުގެ މެންދުރުފަހު 1:30 ގައެވެ.
މި މައްސަލައިގެ އަޑުއެހުމެއް އެންމެ ފަހުން ބާއްވާފައިވަނީ މި ދިޔަ މަހުގެ 27 ވަނަ ދުވަހުއެވެ. ނަމަވެސް ޒަރޫރީ ބޭނުމެއްގައި އާޒިމާ ހޮސްޕިޓަލަށް ދާން ޖެހުމުން އެދުވަހުގެ އަޑުއެހުން ވަނީ ކުރުކޮށްލާފައެވެ.
ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާ އާޒިމާގެ މައްޗަށް ކޮށްފައި ވަނީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ އިސްލާމިކް ބޭންކު އެކައުންޓަށް ޖަމާވި އެއް މިލިއަން ޑޮލަރު އެމަނިކުފާނާއި އޭސީސީއާ ދެމެދު ހެދި އެސްކްރޯ އެކައުންޓަށް ޖަމާކުރި ކަމަށް ބުނެ އޭސީސީއަށް ދޮގު މައުލޫމާތު ދެއްވި ކަމަށް ތުހުމަތުކޮށެވެ.
