ތަފާތު ކުލަތަކުން ޖަރީކޮށް، ފޭދޫ ‘ރަށިކެޑަ އަތިރި’ ރަސްމީކޮށް މިއަދު ހުޅުވައިފި
ގިނަ ދުވަސް ތަކެއްގެ ބުރަ މަސައްކަތާއެކު، ފޭދޫ ރަށިކެޑެ އަތިރި ރަނގަޅު ފެންވަރަކަށް ހަދައި، އެތަން ރަސްމީ ސިފައެއްގައި މިއަދު ހުޅުވައިފިއެވެ.
މި އަތިރި ހުޅުވުމަށް ބޭއްވުނު އިވެންޓުގައި‘މިވަރުން ވޭށީ’ އާއި ގުޅިގެން އޮންލައިންކޮށް ކާބޯތަކެތީގެ ވިޔަފާރި ކުރާ ފަރާތްތަކަށް، އެ މީހުންގެ ބާވަތްތައް ވިއްކާލުމުގެ ފުރުސަތު ވެސް ހުޅުވިގެން ދިޔައެވެ.
ފޭދޫ ރައްޔިތުންތަކެއްގެ އިސްނެގުމާއެކު ފެށިގެން ދިޔަ މި މަސައްކަތުގައި އެރަށުގެ ގިނަ ޢަދަދެއްގެ ޒުވާނުން ބައިވެރި ވެފައިވެއެވެ. "ދެން" އަށް މައުލޫމާތު ދެމުން، އަތިރި ހެދުމުގެ މަސައްކަތުގައި އިސްކޮށް އުޅުނު ފަރާތެއް ބުނެފައި ވަނީ ބީޗް ހެދުމުގެ ޚިޔާލު އެންމެ ފުރަތަމަ އައީ އެ ސަރަހައްދުގައި ފަތާ ޓްރެކެއް އެޅުމުން ކަމަށެވެ. އަދި މިކަމުގެ ބޭނުމަކަށްވީ އެތަނަށް ގޮސް އުޅޭ މީހުންނަށް ހިތްފަސޭހަ އަދި ހިތްގައިމު މާހައުލެއް ފޯރު ކޮށްދިނުން ކަމަށެވެ.
އައްޑޫގެ އެހެން ބީޗް ތަކާ އަޅާ ބަލާއިރު މި ބީޗަކީ ވަރަށް ވެސް ތަފާތު ބީޗެކެވެ. މިބީޗުގައިވާ ކޮންމެ އެއްޗަކުން ވެސް އެ މަސައްކަތުގައި ޝާމިލުވި މީހުންގެ އުފެއްދުންތެރިކަން ފެނިގެންދެއެވެ. އެގޮތުން، މި ބީޗަށް މީހުން ގޮސް އިށީނދެ ތިބުމަށް ހަދާފައިވާ ޖޯލިފަތި ތަކާއި އަދި ބެންޗުތައް ވެސް ތައްޔާރު ކޮށްފައިވަނީ އަމިއްލަ އަށް ދަނޑި އާއި ލަކުޑި ފަދަ ތަކެތި ބޭނުން ކޮށްގެންކަން ފާހަގަ ކުރެވެއެވެ. މީގެ އިތުރުން، އެތަނުގައި ބަހައްޓާފައިވާ އުނދޯލި ތަކަކީ ވީރާނާ ވެފައިވާ ޕާކެއްގައި ހުރި އެއްޗިއްސެވެ. ނަމަވެސް، އެ އުނދޯލިތައް މަރާމާތު ކޮށްފައި ވާގޮތް ފުރިހަމަ ކަމުން، އެ އެއްޗެހި ހީވަނީ ހަމަ މުޅިން އައު އެއްޗެހި ތަކެއް ހެންނެވެ.
މި އިވެންޓުގެ ޕާޓްނަރުންނަކީ ‘މިވަރުން ވޭށީ’ އަދި ‘އައި ލަވް އައްޑޫ’އެވެ. އަދި ހަމަ އެއާއެކު، ފޭދޫގެ ކާބޯތަކެތީގެ ކުދި ވިޔަފާރި ކުރާ ފަރާތްތަކަށް އެމީހުންގެ އުފެއްދުންތައް މީހުންނަށް ދައްކާލުމުގެ ފުރުސަތު ވެސް ހުޅުވިފައި އޮތެވެ. މި ސްޓޯލް ތަކުން ވިޔަފާރި ކުރާ ފަރާތްތަކުގެ މެދުގައި ނެގޭ ލަކީޑްރޯ ގެ ނަސީބުވެރި އަކަށް ‘މިވަރުން ވޭށީ’ގެ ފަރާތުން ‘މާކުންބެ ގިފްޓް ޕެކް’ގެނަމުގައި އިނާމެއް ލިބެއެވެ. އަދި މި ލަކީޑްރޯ ނެގުން އޮންނާނީ މިރޭ 22:30 ގައެވެ.
މީގެ އިތުން މި ބީޗް ހުޅުވުމާ ގުޅިގެން ފޮޓޯ ޗެލެންޖެއް ވެސް 3 ދުވަހުގެ ނިޔަލަށް ކުރިޔަށް ދާނެއެވެ. #FeydhooRashiKedaAthiri އަދި #InstaWorthyVeyheh، މި ހޭޝްޓެގްތައް ބޭނުން ކޮށްގެން މީސްމީޑިއާގައި ހިއްސާކުރާ ފޮޓޯތަކުގެ ތެރެއިން އެންމެ ގިނަ ލައިކްސް ލިބޭ ތިން ފަރާތެއް ހޮވާ، ޚާއްސަ އިނާމެއް ވެސް ލިބޭނެ ކަމަށް މި ހަރަކާތްތައް ހިންގާ ފަރާތުން ބުނެއެވެ.
