ސިވިލް ކޯޓާއި ކްރިމިނަލް ކޯޓަށް އަލަށް އައްޔަންކުރެއްވި ފަސް ފަނޑިޔާރުން ހުވާކުރައްވައިފި

ޖުޑީޝަލް ސަރވިސް ކޮމިޝަން (ޖޭއެސްސީ)ގެ ފަރާތުން ސިވިލް ކޯޓަށާއި ކްރިމިނަލް ކޯޓަށް އަލަށް އައްޔަންކުރެއްވި ފަސް ފަނޑިޔާރުން، ސުޕްރީމް ކޯޓުގައި މިއަދު ބޭއްވި ޚާއްޞަ ރަސްމިއްޔާތެއްގައި އެބޭފުޅުންގެ މަޤާމުގެ ހުވާކުރައްވައިފިއެވެ.

އުއްތަމަ ފަނޑިޔާރު ޢަބްދުލްޣަނީ މުޙައްމަދު ބައިވެރިވެވަޑައިގެންނެވި މި ރަސްމިއްޔާތުގައި، އައު ފަނޑިޔާރުންނަށް ހުވާލައިދެއްވީ ދިވެހިރާއްޖޭގެ ހައިކޯޓުގެ ފަނޑިޔާރު އަލްއުސްތާޛާ ފާތުމަތު ފަރުހީޒާއެވެ. މީގެ އިތުރުން، އައްޔަންކުރެއްވި ކަމުގެ ފަތްކޮޅު ފަނޑިޔާރުންނާ ހަވާލުކޮށްދެއްވީ ޖޭއެސްސީގެ ރައީސް އަދި މަނަދޫ ދާއިރާގެ މަޖިލިސް މެންބަރު ޙުސްނީ މުބާރިކެވެ.

ފަނޑިޔާރުންގެ ޢަދަދު އިތުރުކުރުމުގެ ބޭނުމުގައި ސިވިލް ކޯޓަށް އައްޔަންކުރައްވާފައި ވަނީ ގއ. ކަނޑުހުޅުދޫ ރީލްމަންޒިލް އަލްއުސްތާޛް މުޙައްމަދު ނިޝާޠު އާއި ރ. ހުޅުދުއްފާރު ރޯޒްވިލާ އަލްއުސްތާޛާ އާސިޔާ އަޡީމާއެވެ. ޤާނޫނީ ރޮނގުން މާސްޓަރސް ފެންވަރަށް ތަޢުލީމު ހާސިލުކުރައްވާފައިވާ އަލްއުސްތާޛް ނިޝާޠަކީ ޝަރުޢީ ދާއިރާގައި 15އަހަރަށްވުރެ ދިގު މުއްދަތެއްގައި ޚިދުމަތްކުރައްވާފައިވާ، އަދި ކަނޑުހުޅުދޫ ކޯޓުގެ އިސްމެޖިސްޓްރޭޓްކަން ވެސް ކުރައްވާފައިވާ ތަޖުރިބާކާރެކެވެ. މީގެ އިތުރުން ބާ ކައުންސިލާއި އޭޖީ އޮފީހުގެ އިސް މަޤާމުތަކެއް ވެސް އޭނާ ފުރުއްވިއެވެ. ހަމައެހެންމެ، އިނގިރޭސިވިލާތުން މާސްޓަރސް ހައްދަވާފައިވާ އަލްއުސްތާޛާ އާސިޔާއަކީ ރައްޔިތުންގެ މަޖިލީހުގެ ލީގަލް އޮފިސަރުކަމާއި ޑެޕިއުޓީ ޑިރެކްޓަރުކަން 7އަހަރެއްހާ ދުވަހު ކުރައްވާފައިވާ ބޭފުޅެކެވެ.

ކްރިމިނަލް ކޯޓަށް 3ބޭފުޅަކު އައްޔަންކުރައްވާފައިވާއިރު، އޭގެ ތެރެއިން ދެ ބޭފުޅުންނަކީ ވެސް އެ ކޯޓުގެ ބެންޗު ބޮޑުކުރުމަށް އައްޔަންކުރެވުނު ބޭފުޅުންނެވެ. އެ ކޯޓުގެ ޤާޟީކަމާ ހަވާލުވެވަޑައިގަތީ ޅ. ކުރެންދޫ ނޫރާނީމާގެ އަލްއުސްތާޛް ސުލައިމާން މުޙައްމަދު، ހއ. ދިއްދޫ ޑޭޒީމާގެ އަލްއުސްތާޛް އަޙްމަދު ތައުފީޤު އަދި ތ. ވޭމަންޑޫ ޑްރީމް އަލްއުސްތާޛް މުޙައްމަދު ޢަބްދުﷲއެވެ.

ޝަރީޢަތާއި ޤާނޫނުގެ ރޮނގުން ޑިގްރީ ހާސިލުކުރައްވާފައިވާ އަލްއުސްތާޛް ސުލައިމާނަކީ ހިންނަވަރާއި ކުރެންދޫ ކޯޓުގެ އިސްމެޖިސްޓްރޭޓްކަމާ އެކު ޝަރުޢީ ދާއިރާގައި 12އަހަރު ހޭދަކުރައްވާފައިވާ ބޭފުޅެކެވެ. މެލޭޝިއާއިން މާސްޓަރސް ފުރިހަމަކުރައްވާފައިވާ އަލްއުސްތާޛް ތައުފީޤަކީ ޕީޖީ އޮފީހާއި އޭޖީ އޮފީހުގެ އެކި މަޤާމުތަކުގައި 18އަހަރުގެ ދިގު މާޒީއެއް އޮތް ބޭފުޅެކެވެ. އަދި އިންޑިއާއިން ޤާނޫނީ ތަޢުލީމު ހާސިލުކުރައްވައިގެން ހުންނެވި އަލްއުސްތާޛް މުޙައްމަދު ޢަބްދުﷲ ވަނީ ވޭތުވެދިޔަ 8އަހަރު ޕީޖީ އޮފީހުގެ ސީނިއަރ ޕަބްލިކް ޕްރޮސިކިއުޓަރެއްގެ ގޮތުގައި މަސައްކަތްކުރައްވާފައެވެ.