އަޅުގަނޑު ޖޭއެސްސީ ގައި އިނުމަކީ ރައީސް ޔާމީން އެންމެ ބޭނުންވާނެ އެއް ކަންތައް: ރައީސް ނަޝީދު
ޖުޑީޝަލް ސާވިސް ކޮމިޝަން (ޖޭއެސްސީ) ގައި ރައްޔިތުންގެ މަޖިލީހުގެ ރައީސް ގެ ހައިސިއްޔަތުން ރައީސް ނަޝީދު އިންނެވުމަކީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް އެންމެ ބޭނުންވާނެ އެއް ކަންތައް ކަމުގައި ރައީސް ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވެފައިވަނީ މިއަދުގެ މަޖިލިސް ޖަލްސާގައި މާވަށު ދާއިރާގެ މެންބަރު މުޙައްމަދު ސައީދު ދެއްކެވި ވާހަކައަކާއި ގުޅިގެންނެވެ.
މެންބަރު ސައީދު ވިދާޅުވެފައިވަނީ ރާއްޖޭގައި ކާމިޔާބު ކަމާއެކު ވެރިކަން ކުރެއްވި ފަރާތެއް އިންނަވަންޖެހޭ ތަނަކީ ޖަލު ނޫން ކަމަށާއި ޖޭއެސްސީ ގައި ރައީސް ނަޝީދު އިންނަވައިގެން ރައީސް ޔާމީނަށް އިންސާފު ނުލިބޭނެ ކަމަށް މިހާރު ރައްޔިތުން ވެސް ޤަބޫލު ކުރައްވާ ކަމަށެވެ.
މިވާހަކަތަކާ ގުޅިގެން ރައީސް ނަޝީދު ވިދާޅުވީ ރައީސް ޔާމީނު މިވަގުތު އެންމެ އެދޭނެ އެއް ކަމަކީ ވެސް އެމަނިކުފާނު ޖޭއެސްސީ ގައި އިންނެވުން ކަމަށެވެ.
"އަޅުގަނޑު ވަރަށް ތެދަށް މިދަންނަވަނީ. އަޅުގަނޑަށް ފެންނަ ފެނުމުގައި ރައީސް ޔާމީން އެންމެ ބޮޑަށް އެދިވަޑައިގަންނަވާނެ އެއްކަމަކީ އަޅުގަނޑު ޖޭއެސްސީ ގައި އިނުން" ރައީސް ނަޝީދު ވިދާޅުވެފައިވެއެވެ.
މީގެއިތުރުން ރައީސް ނަޝީދު ވިދާޅުވީ، ޖޭއެސްސީ ގައި އިންނަވައިގެން ކުރައްވާ ހުރިހާ މަސައްކަތެއް ވެސް ކުރައްވާނީ އިންސާފުވެރިކަމާއި މަދަދުވެރިކަމާއެކު ކަމަށެވެ.
Ads by STO
