ގައްދޫގައި އަޅާ ޒަމާނީ ހޮސްޕިޓަލުގެ މަސައްކަތް ފަށައިފި

ގދ. ގައްދޫގައި އަޅާ ޒަމާނީ ހޮސްޕިޓަލުގެ މަސައްކަތް ފަށައިފިއެވެ.

ގދ. ގައްދޫގައި ހޮސްޕިޓަލެއް އަޅަން އެމްޓީސީސީއާ ހަވާލުކުރީ މިދިޔަ އަހަރުގެ ނޮވެމްބަރު މަހުއެވެ.

އެމްޓީސީން މިއަދު ބުނީ އެ މަސައްކަތް މިހާރު ފަށާފައިވާ ކަމަށާއި މިހާރު ކުރަމުން ދަނީ އެ ހޮސްޕިޓަލުގެ ސަބް ސްޓްރަކްޗާގެ މަސައްކަތް ކަމަށެވެ.

އެ މަޝްރޫއުގެ ދަށުން 30 އެނދުގެ ޖާގައިގެ 4 ފަންގިފިލާގެ އިމާރާތެއް ބިނާކުރަން ވަނީ ނިންމައިފައެވެ.

އޭގެ އިތުރުން 2563 އަކަފޫޓުގެ ސަރަހައްދެއްގައި 1 ފަންގިފިލާ ސަރވިސް ބްލޮކެއް އިމާރާތްކޮށް 3573 އަކަފޫޓު ސަރަހައްދެއްގައި 2 ފަންގިފިލާގެ އެކޮމަޑޭޝަން ބްލޮކެއް ވެސް އެ މަޝްރޫއުގެ ދަށުން އިމާރާތް ކުރާނެއެވެ.

އެމްޓީސީސީއާ އެ މަސައްކަތް ހަވާލުކޮށްފައި ވަނީ 101.7 މިލިއަން ރުފިޔާއަށް 600 ދުވަސް ތެރޭގައި ނިންމާ ގޮތަށެވެ.