ޕޭމަންޓު ގޭޓުވޭ އެއް ނެތުމުގެ ސަބަބުންރަޝިއާ އަށް, ތޮއްޑޫ ފަޅޯ ވިއްކުމުގެ ދަތިތަކެއް
އއ. ތޮއްޑޫގެ ދަނޑުވެރިން ހައްދާ ފަޅޯ އެ ރަށަށް ޒިޔާރަތްކުރާ ގިނަ އަދަދެއްގެ ރަޝިޔާގެ ފަތުރުވެރިން އެ ގައުމަށް ގެންދާ ކަމަށް ތޮއްޑޫ ދާއިރާގެ މެންބަރު ހަސަން ޝިޔާން ވިދާޅުވެއްޖެ އެވެ.
ޝިޔާން މިހެން ވިދާޅުވީ މަޖިލީހުގެ މިއަދުގެ ޖަލްސާގައި ޕޭމަންޓް ސިސްޓަމާއި ޕޭމަންޓް ހިދުމަތުގެ ބިލަށް ބަހުސް ކުރައްވަމުންނެވެ،
އެގޮތުން ޝިޔާން ވިދާޅުވީ ރަޝިއާ އަށް ފަޅޯ ގެންދިޔަ ނަމަވެސް އެ ވިޔަފާރީއަށް އޮތް އެންމެ ބޮޑު އެއް ހުރަހަކީ ޕޭމަންޓް ހެދުމުގައި ދިމާވާ ދަތިތައް ކަމަށެވެ. އަދި ޕޭމަންޓު ސިސްޓަމް ތައާރަފް ކުރެވުމާއެކު ރާއްޖޭގެ ދަނޑުވެރިން ހައްދާ އެކި ބާވަތްތައް އިންޓަނޭޝަނަލް މާކެޓުގައި ވިއްކުމުގެ ދޮރު އިތުރަށް ތަނަވަސް ވެގެންދާނެ ކަމުގައި ޝިޔާން ވިދާޅުވިއެވެ.
"ހާއްސަގޮތެއްގައި އަޅުގަނޑަށް ތަަޖުރިބާ ކުރެވޭ ތޮއްޑޫގައި ހައްދާ ފަޅޯ ރަޝިޔާއަށް ބޭރުކުރުމުގެ އިންތިޒާމްތައް މިހާރު ވެސް އެ ދަނީ ހަމަޖެހެމުން. ދިމާވާ މައްސަލައަކީ މިހެން ހުންނަ ކުދި ކުދި ޕޭމަންޓްތައް ހެދުމުގެ ދިމާވާ މައްސަލަތައް." ޝިޔާން ވިދާޅުވިއެވެ.
ފަސޭހަ ކަމާއި އެކު ޕޭމަންޓް ހެދޭނެ ގޮތެއް ވުމަކީ ކުދި އަދި މެދު ފަންތީގެ ވިޔަފާރިވެރިންގެ ވަރަށް ބޮޑު އުންމީދެއް ކަމަށާއި ގެސްޓް ހައުސް ވިޔަފާރި ކުރާ ފަރާތްތަކުން ޕޭމަންޓްތައް ދެއްކުމުގައި ބޮޑު ތަކުލީފުތަކެއް އުފުލަން ޖެހޭކަން ވެސް ޝިޔާންގެ ވާހަކައިގައި ފާހަގަކުރެއްވިއެވެ،
