ހުއްދަ ނުހޯދާ ކައިވެނި ކުރުމުން ހޯމް މިނިސްޓަރ އިމްރާން 5000 ރުފިޔާއިން ޖޫރިމަނާކޮށްފި
ހޯމް މިނިސްޓަރ އިމްރާން ޢަބްދުﷲ އާއި ޖެންޑާ މިނިސްޓްރީގެ ނައިބު ފާތިމަތު ޔުމްނާ، ފެމިލީ ކޯޓުގެ ހުއްދަ ނުހޯދާ ކައިވެނި ކޮށްފައިވާތީ 5000 ރުފިޔާއިން ޖޫރިމަނާ ކޮށްފިއެވެ.
އެނގިފައިވާ ގޮތުގައި މިނިސްޓަރ އިމްރާން ޖޫރިމަނާ ކޮށްފައިވަނީ ދެ އަނތްބަށް ކައިވެނިކުރާއިރު ފެމެލީ ކޯޓުގެ ހުއްދަ ހޯދަން ޖެހޭކަމަށް ޤަވައިދުގައި އޮތް ނަމަވެސް އެހުއްދަ ނަގާފައި ނުވާތީއެވެ.
މިނިސްޓަރ އިމްރާނާއި ޔުމްނާ ކައިވެނި ކޮށްފައި ވަނީ ރާއްޖޭގެ ކޯޓުތަކުގެ އިންތިޒާމްތަކުގެ ބޭރުން، ހުޅުމާލޭގައި، ލަންކާގައި ހުރި މައުޒޫނަކު ލައްވާާ އޮންލައިންކޮށް ކަމަށް "އަދިވެސް" ނޫހުން ބުނެފައިވެއެވެ.
އެގޮތުން އެނޫހުން ބުނެފައިވަނީ އިމްރާނާއި ޔުމްނާ ކައިވެނި ކޮށްފައި ވަނީ 28 މާޗު 2020 ގެ 21:45 ގައި ހުޅުމާލެ މަރީނާ ވިއުގައި ކަމަށެވެ. ވަލީ ދީފައި ވަނީ ޔުމްނާގެ ބައްޕަ، މޫސާ ނިޒާރެވެ. ހެކިވެރިންގެ ގޮތުގައި ތިބީ މުހައްމަދު އިބްރާހިމް ކިޔާ މީހަކާއި ހޯމް މިނިސްޓްރީގެ ސްޓޭޓް މިނިސްޓަރ އަލީ ނަޒީރެވެ.
"މި ކައިވެނި ކޮށްދެއްވި މައުޒޫނަކީ ލަންކާގެ މައުލަވީ އަލްހާފިޒު އަލްހާއްޖު، އެސް.ޔޫ މުހައްމަދު ލަފިރު (މަނާރީ) އެވެ. މީނާއަކީ ލަންކާގައި ވަރަށް ގިނަ ދިވެހިންނަށް ވެސް ކައިވެނި ކޮށްދޭ މައުޒޫނެއް ކަމަށް މައުލޫމާތު ލިބެއެވެ. އޭނާ ކޮށްދޭ ކައިވެނި ލަންކާގައި ހުންނަ ދިވެހި ހައިކޮމިޝަނުން ގަބޫލުކުރާ ކަމަށް ވެސް ވެއެވެ. މި ކައިވެނި ކޮށްދިންއިރު، ކޮވިޑް-19 ގެ އާލަމީ ވަބާގެ ސަބަބުން ލަންކާގައި ކަރފިއު ހިންގާފައި އޮތުމުން، ކައިވެނީގެ މަޖިލީސް އަށް ދެމަފިރިންނަށް ފަރުދީ ގޮތުން ހާޒިރު ނުވެވުނީ ކަމަށާއި އެހެންވެ ކައިވެނި ކޮށްދީފައި ވަނީ އޮންލައިންކޮށް ކަމަށް ކައިވެނީގެ ލިއުމެއްގައި މައުޒޫނު ބުނެ، ސޮއި ކޮށްފައިވެއެވެ." އަދިވެސް ނޫހުގެ އެ ޚަބަރުގައި ބުނެފައި ވެއެވެ.
މީގެއިތުރުން އެނޫހުން ބުނެފައި ވަނީ ކައިވެނި ކޮށްދިން މައުޒޫނަކީ "ދިވެހި އެމްބަސީގެ ހުއްދަ އޮންނަ ބޭފުޅެއް" ކަމަށާއި "އޮންނަ އުސޫލުން ފެމިލީ ކޯޓުގައި (ކައިވެނި) ރަޖިސްޓްރީކޮށްފައިވާ" ކަމަށް ހޯމް މިނިސްޓަރ އިމްރާން އެނޫހަށް މައުލޫމާތު ދީފައިވާ ކަމަށެވެ.
ފެމިލީ ކޯޓުގެ ޤަވާއިދު ބުނާގޮތުންނަމަ، ކޯޓުގެ ހުއްދަ ނެތި ރާއްޖެއިން ބޭރުގައި ދެ އަނތްބަށް ކައިވެނިކޮށްފި ނަމަ، 5،000 ރުފިޔާ އިން ޖޫރިމަނާކުރެއެވެ. އެހެންވެ އިމްރާނުގެ ކައިވެނި ވެސް ރަޖިސްޓްރީކުރަން ހުށަހެޅުމުން، 5،000 ރުފިޔާ އިން ވަނީ ޖޫރިމަނާ ކޮށްފައިވާ ކަމަށް "ވަގުތު" ގައި ބުނެފައިވެއެވެ.
