ޔުނާންގެ މައްޗަށް 9 ދައުވާއެއް، ރިހޫގެ މައްޗަށް 5 ދައުވާއެއް ކޮށްފި
ކުޑަކުދިން ތަކަކަށް ޖިންސީ ގޯނާ ކުރިކަމުގެ ތުހުމަތުގައި ބަންދުކޮށްފައިވާ ފިލްމީ ތަރި މުޙައްމަދު ޔުނާންގެ މައްޗަށް ނުވަ ދައުވާއެއް، އަދި އޭނާގެ އަނބިމީހާ ފާތިމަތު ރިހުލާ (ރިހޫ) ގެ މައްޗަށް ފަސް ދައުވާއެއް ކުރަން ހުޅުމާލެ މެޖިސްޓްރޭޓް ކޯޓަށް ހުށަހަޅައިފިއެވެ.
ޔުނާން އާއި ރިހޫގެ މައްޗަށް ތުހުމަތު ކޮށްފައިވަނީ ކުޑަ ފިރިހެން ކުއްޖަކަށް ޖިންސީގޯނާ ކުރިކަމުގެ ތުހުމަތެވެ. އެނގިފައިވާ ގޮތުގައި އެއީ ޔުނާންގެ އާއިލާ ކުއްޖެކެވެ.
މިތުހުމަތުގައި އެދެމަފިރިން ހައްޔަރު ކޮށްފައި ވަނީ އޮކްޓޯބަރު މަހުގެ 4 ވަނަ ދުވަހުގެ ރޭގެ ވަގުތެއްގައެވެ. އެމައްސަލަ ޔުނާންގެ ޢާއިލާގެ ފަރާތުން ހުށަހެޅީ އޮކްޓޯބަރ 3 ގައެވެ.
ޔުނާންގެ މައްޗަށް ކުރާ ދައުވާތައް:
▪︎ ކުޑަކުއްޖަކު އިތުބާރު ކުރަން ޖެހޭ މަގާމެއްގައި ހުރި މީހަކު ޖިންސީ އަމަލެއް ބަޔަކާ ހިންގާ މަންޒަރު އެ ކުއްޖާއަަށް ދެއްކުމުގެ ދެ ދައުވާ،
▪︎ އެ ކުއްޖާ ލައްވާ ޖިންސީ އަމަލެއް ހިންގުވުމުގެ ދެ ދައުވާ،
▪︎ އާއިލާގެ މެންބަރަކު އެ އާއިލާ ކުޑަކުއްޖަަކާއެކު ޖިންސީ އަމަލެއް ހިންގުމުގެ ދައުވާ،
▪︎ އެ ކުއްޖާއަށް ދެއްކުމުގެ މަގްސަދުގައި ޖިންސީ އަމަލެއް ހިންގުމުގެ ދެ ދައުވާ،
▪︎ އޮރިޔާންކާޑު ގެންގުޅުމުގެ ދައުވާއަކާއި އޮރިޔާން ކާޑު އުފެއްދުމުގެ ދައުވާ އެކެވެ.
ރިހޫގެ މައްޗަށް ކޮށްފައިވާ ދައުވާތައް:
▪︎ ކުޑަކުއްޖަކު އިތުބާރު ކުރަން ޖެހޭ މަގާމެއްގައި ހުރި މީހަކު އެ ކުޑަކުއްޖަކާއެކު ޖިންސީ އަމަލެއް ހިންގުމުގެ ދައުވާ،
▪︎ އެ ކުއްޖާގެ ހާޒިރުގައި އެ ކުއްޖާއަށް ދެއްކުމުގެ މަގްސަދުގައި ޖިންސީ އަމަލެއް ހިންގުމުގެ ދެ ދައުވާ،
▪︎ އޮރިޔާންކާޑު ގެންގުޅުމުގެ ދައުވާއަކާއި އޮރިޔާން ކާޑު އުފެއްދުމުގެ ދައުވާ އެކެވެ.
