34 ބިލިއަން ރުފިޔާގެ ބަޖެޓްގެ 50 އިންސައްތައަކީ ދަރަނި، މި ބަޖެޓަށް ރައްޔިތުން ބުނާނީ ނޫނެކޭ: މުއިއްޒު
ސަރުކާރުން އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހެޅި 34 ބިލިއަން ރުފިޔާގެ ބަޖެޓްގެ 50 އިންސައްތަ އަކީ ދަރަނި ކަމަށާއި މި ބަޖެޓަށް ރައްޔިތުން ބުނާނީ ނޫނެކޭ ކަމަށް ޕްރޮގްރެސިވް ޕާޓީ އޮފް މޯލްޑިވްސްގެ ނައިބު ރައީސް އަދި ކުރީގެ ހައުސިން މިނިސްޓަރ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
މުޢިއްޒު ކުރެއްވި ޓްވީޓެއްގައި ވިދާޅުވީ ސަރުކާރުން އާމްދަނީ ހޯދުމަށް ވިސްނާފައި އޮތީ ރައްޔިތުންގެ ބިމާއި ހަރުމުދާ ވިއްކައިގެން ކަމަށާއި ،މަޖިލީހުގައި ސަރުކާރަށް ސްޕަރ މެޖޯރިޓީ އޮތުމާއެކު ބަޖެޓް ފާސް ކުރެވިދާނެ ކަމަށެވެ. ނަމަވެސް އެ ބަޖެޓަށް ރައްޔިތުން ބުނާނީ ނޫނެކޭ ކަމަށް މުޢިއްޒު ވިދާޅުވިއެވެ.
ކުރިއަށް އޮތް ލޯކަލް ކައުންސިލް އިންތިޚާބުގައި މާލޭ މޭޔަރު ކަމަށް ވެސް ވާދަ ކުރައްވާ ޑރ. މުޢިއްޒު މިހެން ވިދާޅުވިއިރު ދައުލަތުގެ ކުރިއަށް އޮތް އަހަރުގެ ބަޖެޓްގައި އާމްދަނީ ހޯދުމަށް ހިމަނުއްވާފައި ވަނީ ކުންފުނިތަކުގެ ހިއްސާ ވިއްކުމާއި ބިން ވިއްކުންފަދަ ހަރަކާތްތައް ފާހަގަ ކުރެވެއެވެ. މީގެ އިތުރުން ސްޓިކާ ޖެހުން ފަދަ ކަންކަމާއި ބޭރުގެ ލޯންތަކުން ބޮޑެތި އާމްދަނީ ލިބޭނެ ކަމަށް ލަފާ ކޮށްފައި ވެއެވެ.
މީގެ އިތުރުން އަންނަ އަހަރަށް ކަނޑައެޅި 34 ބިލިއަންގެ ބިޔަ ބަޖެޓްގެ ތެރެއިން 20 ބިލިއަންއަކީ ރިކަރެންޓް ޚަރަދެވެ. ރިކަރެންޓް ޚަރަދުގެ ގޮތުގައި ސިޔާސީ އިތުރު މަގާމު އުފައްދާ އެމަގާމުތަކުގެ މުސާރައާ އެލަވަންސް ވެސް ހިމަނާފައި ވެއެވެ.
ދައުލަތުގެ ދަރަނި އެތައް ގުނައަކުން އިތުރުވެ ފިޗްގެ ރޭޓިން ދަށްވެފައިވާއިރު ކުރިއަށް އޮތް 18 މަސް ދުވަހު ދައުލަތުން ލޯނަށް އެއް ބިލިއަން ޑޮލަރު ދައްކަން ޖެހޭ ކަމަށް ބުނެ އިދިކޮޅުން ދަނީ ސަރުކާރަށް ފާޑު ކިޔަމުންނެވެ.
Ads by STO
