އެމެރިކާގައި އެންމެ ގިނަ ބަޔަކު ފައްސިވީ އިއްޔެ، ޑޮކްޓަރުން ބުނަނީ ލޮކްޑައުން އަކަށް ދާން ނުޖެހޭނެ ކަމަށް
އެމެރިކާގައި ކޮވިޑް-19 ޖެހިގެން އެންމެ ގިނަ މީހުން ފައްސިވި ދުވަހަކަށް އިއްޔެ ވެއްޖެއެވެ. މިއީ ޖެހިޖެހިގެން ރެކޯޑު އަދަދަކަށް ކޭސްތަކުގެ އަދަދު ގިނަވި ދެވަނަ ދުވަހެވެ.
އިއްޔެ އެކަނި ވެސް އެމެރިކާއިން ވަނީ 144,133 ފައްސިވެފައެވެ. ފާއިތުވި ހަފްތާއެއްހާ ދުވަހުގެ ތެރޭގައި އެމެރިކާގައި ފައްސިވާ މީހުންގެ އަދަދު އިތުރު ވެފައިވާއިރު، އެވްރެޖުކޮށް ކޮންމެ ދުވަހަކު ވެސް 120,000 މީހުނަށް ވުރެ ގިނަ މީހުން އަންނަނީ ކޮވިޑަށް ފައްސި ވަމުންނެވެ.
މީގެ އިތުރުން އެމެރިކާގައި އެއް ދުވަސްތެރޭގައި އެންމެ ގިނަ އަދަދެއްގެ މީހުން ކޮވިޑް ބަލީގައި މަރުވި ދުވަހަކީ ވެސް އިއްޔެއެވެ. އިއްޔެ އެގައުމުން ވަނީ 1,893 މީހަކު މަރުވެފައެވެ. މީގެ ކުރިން އެންމެ ގިނަ މީހުން މަރުވެފައިވަނީ މާޗް މަހުގެ ތެރޭގައެވެ.
ކޭސްތައް އިތުރުވަމުން އައި ނަމަވެސް މަރުވާ މީހުންގެ އަދަދު ކޮންޓްރޯލެއްގައި ހިފެހެއްޓިފައިވާ ކަމަށް އެމެރިކާގެ ކަމާބެހޭ އިދާރާތަކުން ބުނެއެވެ.
އިތުރުވަމުން އަންނަ ކޭސްތަކާއެކު އެމެރިކާގެ އިންތިހާބީ ރައީސްގެ ބައެއް ބޭފުޅުން ވަނީ އެެމެރިކާ 6 ހަފްތާގެ ލޮކްޑައުންއަކަށް ދިއުމަށް ތާއީދުކޮށް ވާހަކަ ދައްކަވާފައެވެ.
ނަމަވެސް ބައެއް ޑޮކްޓަރުން ވަނީ އެއީ އަދި އެންމެ ރަނގަޅު ގޮތް ނޫން ކަމަށާއި ލޮކްޑައުން އަކަށް ދާން ޖެހޭ މިންވަރަށް ހާލަތު ގޯސްނުވާ ކަމަށް ބުނެފައެވެ.
