ލޮނުޒިޔާރާތް ޕާކަށް ވަނުމަށް އެތައް ބަޔަކު ކިޔޫގައި، ކޮވިޑް ނުފެތުރޭ ތަނަކީތަ؟
ހަނދާނަން އަންނަނީ މީގެ ހައެއްކަ މަސް ދުވަސް ކުރިއެވެ. ކޮވިޑް-19ގެ ފުރަތަމަ ކޭހެއް ވެރި ރަށް މާލެއިން ފެނުމުން ދިވެހިން އުޅުނު ގޮތެވެ. މުޅި ރާއްޖެ ފުރަބަންދުގެ ހާލަތަށް ގެނެވި، ގިނަ ބައެއްގެ ހިތުގައި ބިރުވެރިކަމާއި ހާސްކަން އުފެދުނު ދުވަހެވެ. އެ ދުވަސް ދިވެހި ރައްޔިތުން ދުށީ ކަންބޮޑުވެފައިވާ ހާލުގައެވެ. ކޮވިޑް-19 ގެއަށް ވަދެފާނެ ކަމުގެ ބިރަށް ޓަކައި، ފިހާރައަކުން ގަނެގެން ގެންނަ އެއްޗެއް ވެސް ގެއަށް ވައްދަނީ ހަތް ފެނުން ފެން ލުމަށް ފަހުގައެވެ. އިރުކޮޅުކޮޅާ އަތް ދޮވެ ޑޮކްޓަރުންގެ އިރުޝާދުތަކަށް އަމަލު ކުރަމުން ގެންދިޔައެވެ.
ގެއިން ބޭރަށް ދާކަށް އެއްވެސް ދިވެއްސަކު އެ ދުވަހަކު ބޭނުމެއް ނުވިއެވެ. އެދުވަހު ދިވެހީން ބޭނުންވީ ކޮވިޑް-19 އިން ސަލާމަތް ވާށެވެ. އެ ދުވަހު ދިވެހި ރައްޔިތުންނަށް ކޮވިޑް-19 އަކީ ވަރަށް ބިރުވެރި، ނުރައްކާތެރި ބައްޔެކެވެ. އެ ދުވަހު ދިވެހި ރައްޔިތުން އެ ބަލި ޖެހިދާނެ ކަަމަށް ކަންބޮޑުވެ ހާސްވިއެވެ.
މިއަދު އަޅުގަނޑުގެ ހިތުގައި އެތައް ސުވާލެއް އުފެދިއްޖެއެވެ. ދާދި އިހަކަށް ދުވަހު މީސްމީޑިއާ އަށް މީހަކު ލައިފައިވާ ފޮޓޯއެއް ފެނިއެވެ. އަދި އެ މަންޒަރު އަޅުގަނޑުގެ އަމިއްލަ ލޮލުން މިއަދު ފެނުނީމައެވެ. އެ މަންޒަރަކީ މާލޭގެ ހެންވޭރު ކޮޅުގައި އަލަށް ހުޅުވި ލޮނުޒިޔާރާތް ޕާކުގެ ދޮރު ކުރިމަތީގައި ގިނަ ބަޔަކު ކިއޫ ހަދާފައިވާ މަންޒަަރެވެ. ގިނަ ބަޔަކު އެ ޕާކަށް ވަނުމަށް ގައިދުރު ކަމެއް ވެސް ނެތި ތިބި މަންޒަރެވެ. ގިނަ ބަޔަކު އެތަނަށް ޖަމާވެފައިވާއިރު، އެޗްޕީއޭގެ ގައިޑްލައިންތަކުގައި އޮންނަނީ 15 މީހުންނަށް ވުރެ ގިނަ މީހުން އެއްވެ ނޫޅެވޭ ގޮތަށް ކަމަށް ބުނެ އުޅެއެވެ.
އެތަނަށް އެދުވަހު ހަވީރު ވެސް ފަސް ސަތޭކައަށްވުރެ ގިނަ މީހުން ވަންނާނެކަމަށް ލަފާ ކުރެވެއެވެ. އަދި މިއީ އަޅުގަނޑުމެންނަށް ލަފާ ކުރެވޭ އަދަދެކެވެ. ހަގީގަތުގައި އެއަށްވުރެ ގިނައިން ވެސް އެ ޕާކަށް އެދުވަހު މީހުން ގޮސްފައި ހުރެދާނެއެވެ. މައްސަލައެއް ނެތެވެ. ގިނަ މީހުން ޕާކަށް ގޮސްފާނެއެވެ. އެހެން ނަމަވެސް މަގުމަތީގައި ކިއޫ ހަދާއިރު ގައިދުރުކަން އިސް ނުކޮށް ތިބުމަކީ އެންމެ ރަނގަޅު ގޮތްތޯ އަޅުގަނޑުމެން އަމިއްލަ ނަފްސާ ސުވާލު ކޮށްލަން އެބަ ޖެހެއެވެ. އެތަނުގެ ޕޭމަންޓުގައި ތިންފޫޓު ދުރުގައި ތިބެން ފާހަގަ ޖަހާފައި ނުވުމަކީ ދައުލަތުގެ މައްސަލައަކަށް ވެދާނެއެވެ. އެހެން ނަމަވެސް އަޅުގަނޑުމެންނަކީ އަމިއްލައަށް އެވަރުގެ ކަންތައްތައް ނުވިސްނޭ ވަރުގެ ކުޑަކުދިން ބާވައެވެ.
ކޮވިޑް-19ގެ ބިރުވެރިކަން ދިވެހީންގެ ހިތްތަކުން އެހާ އަވަހަށް ފިލައިގެން ދިޔައީ ހެއްޔެވެ؟ ކޮވިޑް-19 ދިވެހިރާއްޖޭގައި ފެތުރިދާނެ ކަމަށް ބިރުން އުޅުނު ދިވެހީން މިއަދު ކޮބައި ހެއްޔެވެ؟ ކޮވިޑް-19 އިން ގައުމު ސަލާމަތް ކުރަން ގޭގައި ތިބި ރައްޔިތުން މިއަދު ނުކުމެ އުޅެން ޖެހޭ ގޮތަކީ މިއީ ހެއްޔެވެ؟ ޅަދަރިން ގޮވައިގެން ޕާކުތަކަށް ވަންނަން ގޮސްފައި ގައިދުރު ކަމެއް ނެތި ތިބުމަކީ ފަރުދީ ޒިންމާ އަދާކުރުން ހެއްޔެވެ؟ ގައިދުރުކަން އިސްކޮށް އެކަކު އަނެކަކާ ތިން ފޫޓު ދުރުގައި ކިއޫ ނުހެދެނީ ހެއްޔެވެ؟
ގޭގައި އަބަދު ބަންދުވެގެން ތިބުމަކީ ނަފްސާނީ ގޮތުން އެންމެ ރަނގަޅު ގޮތަކަށް ވެސް ނުވެދާނެއެވެ. ކުޑަކުދިން ގޮވައިގެން ބޭރަށް ގޮސްލާ ހަދާލަން އެ ކުދިންގެ ބެލެނިވެރިން ބޭނުންވާނެ ކަން ވެސް އަޅުގަނޑު ދެނަހުރީމެވެ. އެހެން ނަމަވެސް ޕާކުތަކާއި މައިޒާންތައް ހުޅުވާލުމުން އަޅުގަނޑުމެންގެ ފަރުދީ ޒިންމާ އެކަމުގައި ނެތްކަމަށް ހީނުކުރާށެވެ. އެތަންތަނަށް ގޮސްފައި ވެސް އިޖުތިމާއީ ގައިދުރުކަން ބެހެއްޓުމަކީ އަޅުގަނޑުމެންގެ ފަރުދީ ޒިންމާއެކެވެ. ކޮންމެ ކަމެއްގައި ދައުލަތް ގޯސް ކުރެވޭކަށް އަޅުގަނޑުމެންނަކަށް ނޯންނާނެއެވެ. އަޑަށް ބާރުލާފައި އަޅުގަނޑުމެން މި ކިޔާ ފަރުދީ ޒިންމާ އަދާ ކުރުމަކީ އެންމެންގެ ވެސް ޒިންމާއެކެވެ.
ކޮވިޑް-19ގެ ކޭސްތައް އަދިވެސް ރާއްޖޭގެ އެކި ކަންކޮޅުތަކުން ފެންނަމުން އެބަދެއެވެ. މި ބަލީގެ ނުރައްކާތެރިކަން މިއަދު ހަނދާން ނައްތާލުމަކީ އަނެއްކާވެސް މި ބަލީގެ ރާޅެއް މި ގައުމަށް ބިންދާލާފާނެ ކަމެއްކަން އަޅުގަނޑުމެން ނުދަންނަ ނަމަ ދެން އެކަން ދަންނާނީ ވަކި ކޮން ބައެއް ހެއްޔެވެ؟ އެހެންކަމުން އަޅުގަނޑުމެން ވިސްނަން އެބަ ޖެހެއެވެ. މިފަދަ ކަންތައްތަކާ ފިކުރު ކުރަން އެބަޖެހެއެވެ. ފުލުހުންނާ ސިފައިން އައިސް އެކަކު އަނެކަކު ގައިދުރުކުރަން ނުބުނި ނަމަވެސް އަޅުގަނޑުމެންނަށް އަމިއްލައަށް ފެނި އެކަން ކުރަން އެބަ ޖެހެއެވެ. އެކަކު އަނެކަކަށް އެކަންތައް ހަނދާން ކޮށްދޭން އެބަޖެހެއެވެ. ނޫންނަަމަ ލޮނުޒިޔާރާތް ޕާކު ފަދަ ޕާކުތަކަކީ ކޮވިޑް-19 ފެތުރުމުގެ ސަބަަބު ކަމުގައިވާކަން މާ ގިނަ ދުވަސްތަކެއް ނުނަގާނެއެވެ.
ލޮނުޒިޔާރާތް ޕާކަށް ވަނުމަށް އެހާ ގިނަ ބަޔަކު އެއްވެފައިވާ މަންޒަރު ފެނުމުން ހިތުގައި އުފެދުނު އެންމެ ބޮޑު ސުވާލު ތިޔަ ކިޔުންތެރިންނަށް އަޅުގަނޑު ދޫކޮށްލާނަމެވެ. ލޮނުޒިޔާރާތް ޕާކަކީ ކޮވިޑް ނުފެތުރޭ ތަނަކީ ހެއްޔެވެ؟
