ރައީސް މާދަމާ ހޯރަފުއްޓަށް ވަޑައިގަންނަވަނީ
ހއ. ހޯރަފުށީ އެއާޕޯޓު ހުޅުވަން ރައީސް އިބްރާހީމް މިއަދު ކުރައްވަން އޮތް ދަތުރުފުޅު މާދަމާ އަށް ފަސްކުރައްވައިފިއެވެ.
ރައީސްގެ ދަތުރުފުޅު މާދަމާ އަށް ފަސް ކުރެއްވީ މޫސުން ގޯސްވުމުގެ ސަބަބުންނެވެ. ރާއްޖޭގެ ހުރިހާ ހިސާބުތަކަށް ވެސް މޫސުން ގޮސް ވާނެ ކަމަށް ލަފާ ކޮށް މެޓް އޮފީހުން ވަނީ ހުދު ސަމާލުނެރެފައެވެ.
އިއްޔެގެ ވަގުތެއްގައި ހޯރަފުށީ އެއާޕޯޓަށް ވަނީ ޓެސްޓް ފްލައިޓެއް ވެސް ޖައްސާފައެވެ. ހޯރަފުށީ އެއަރޕޯޓް އަކީ މި ސަރުކާރުގައި ހުޅުވި ފުރަތަމަ އެއަރޕޯޓެވެ. މި އެއަރޕޯޓް ހުޅުވުމުގެ ރަސްމިއްޔާތު ކުލަ ގަދަކޮށް ބޭއްވުމަށް ވަނީ ހަމަޖެހިފައެވެ.
ހޯރަފުށީ އެއާޕޯޓު ތަރައްގީ ކޮށްފައިވަނީ 1.2 ކިލޯމީޓަރުގެ ރަންވޭއަކާއި 86،35 ސްކޮޔާ މީޓަރުގެ އޭޕްރަން އަކާއި ޓެކްސީ ވޭއެއްގެ އިތުރުން ސާވިސް މަގުތަކާއި، 9،473 ސްކޮޔާ މީޓަރުގެ ޕާކިން އޭރިއާއަކާއި 1،718 ސްކޮޔާ މީޓަރުގެ ފަޔާ އެކްސެސް މަގަކާ އެކު އެވެ.
މި މަޝްރޫއުގެ މަސައްކަތަށް 198 މިލިއަން ހަރަދު ކޮށްފައިވާއިރު އެއާޕޯޓް ޓާމިނަލް އަދި ފަޔާ ބިލްޑިން ތަރައްގީ ކުރުމަށް 13.8 މިލިއަން ރުފިޔާ ހަރަދުވި ކަމަށް އެމްޓީސީސީއިން މީގެ ކުރިން ވަނީ ބުނެފައެވެ.
