ޓެކްނިކަލް މައްސަލައަކާ ގުޅިގެން ބީއެމްއެލްގެ ބައެއް ޚިދުމަތްތަކަށް ބުރޫ އަރައިފި
ޓެކްނިކަލް މައްސަލައަކާ ގުޅިގެން ބޭންކް އޮފް މޯލްޑިވްސް (ބީއެމްއެލް) ގެ ބައެއް ޚިދުމަތްތަކަށް ބުރޫ އަރައިފިއެވެ.
އެގޮތުން ބީއެމްއެލްގެ އިންޓަނެޓް ބޭންކިން އާއި އެހެން ބައެއް ހިދުމަތްތައް ބޭނުން ކުރުމުގައި ވަނީ ދަތިތައް ދިމާވެފައެވެ.
ބީއެމްއެލް އިން ވެސް ބުނެފައި ވަނީ ދިމާވި ޓެކްނިކަލް މައްސަލައަކާއި ގުޅިގެން، އެބޭންކުގެ ބައެއް ޚިދުމަތްތައް ހޯދުމުގައި ކަސްޓަމަރުންނަށް ދަތިތަކަކާ ކުރިމަތިވެދާނެ ކަމަށާއި އެމައްސަލަ ހައްލު ކުރަން މަސައްކަތް ކުރަމުން އަންނަ ކަމަށެވެ.
ބީއެމްއެލް ގެ ޚިދުމަތްތަކަށް ބުރޫއެރުމާ ގުޅިގެން ވަރަށް ގިނަ ބަޔަކު ދަނީ އެކަމާ މީސް މީޑިއާގައި ވެސް ނުރުހުން ފާޅު ކުރަމުންނެވެ. ޚާއްސަކޮށް މިދުވަސްކޮޅަކީ ގިނައިން އިންޓަނެޓް ބޭންކިންގ މެދުވެރިކޮށް ވިޔަފާރީގެ މުއާމަލާތްތައް ވެސް ހިނގަމުން އަންނަ ދުވަސްވަރު ކަމަށް ވާތީ، މިފަދަ މައްސަލަތައް ޖެހުމުން ގިނަ ބަޔަކަށް ވަނީ މިކަމުގެ ތަކުލީފު އުފުލަން ޖެހިފައެވެ.
ބީއެމްއެލްއިން ވަނީ މިކަމާއި ގުޅިގެން ކަސްޓަމަރުންނަށް ދިމާވެދާނެ ދަތިތަކަށް މާފަށް އެދިފައެވެ.
