އެމްއެންޑީއެފުން އަނެއްކާ ވެސް އަސްކަރީ ތަމްރީނުތަކެއް ބާއްވަނީ
ދިވެހި އަސްކަރިއްޔާގެ ފަރާތުން މި މަހު ހުޅުލޭގެ އިރުމަތީ ފަރާތުގައި ހަތިޔާރާއެކު ތަމްރީނުތަކެއް ކުރިއަށް ގެންދިއުމަށް ނިންމައިފިއެވެ.
މޯލްޑިވްސް ނޭޝަނަލް ޑިފެންސް ފޯސް އެމްއެންޑީއެފް އިން މިކަން ހާމަ ކޮށްފައި ވަނީ ސަރުކާރު ގެޒެޓުގައެވެ. މި ތަމްރީނުތަކުގައި ހަތިޔާރެއްގެ ގޮތުން މެޝިންގަން ބޭނުން ކުރުމަށް ހަމަޖެހިފައިވާ ކަމަށް ބުނެފައިވެއެވެ.
އެމްއެންޑީއެފުން ކުރިއަށް ގެންދާ ޚާއްޞަ ތަމްރީނުތައް މި މަހުގެ 6 އިން 7 އަށް އަދި 13 އިން 14 ވަނަ ދުވަހާ ހަމައަށް ކުރިއަށް ދާނެއެވެ. މި ދުވަސްތަކުގެ ހެނދުނު 06:00 އިން 18:00 އަށް ތަމްރީނުތައް ކުރިޔަށްދާނެ ކަމަށް އެމްއެންޑީއެފުން ބުނެއެވެ.
ދިވެހި އަސްކަރިއްޔާއިން އަންނަނީ ސިފައިންގެ ގާބިލްކަން އިތުރު ކުރުމަށް ތަފާތު އެކި ތަމްރީނުތައް ކުރިޔަށް ގެންދަމުންނެވެ. އެގޮތުން މި ދިޔަ ބުރާސްފަތި ދުވަހު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙު ވަނީ ހައްދުންމަތީ ކައްދޫގައި ޤާއިމު ކޮށްފައިވާ މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް) ގައި ކުރިޔަށް ގެންދިޔަ ސިފައިންގެ އަސްކަރީ ތަމްރީނުގެ ޑިމޮންސްޓްރޭޝަން ވެސް ބައްލަވާލައްވާފައެވެ.
މީގެ އިތުރުން އަސްކަަރިއްޔާއިން ވަނީ ފާއިތުވި ނޮވެމްބަރު މަހުގެ 16 އިން 18 އަށް ހުޅުމާލޭ ދެވަނަ ފިޔަވަހީގައި "ސްމޯލް ޓީމް އެކްސަސައިޒް"ގެ ނަމުގައި ހަތިޔާރާއެކު ތަމްރީނުތަކެއް ކުރިއަށް ގެންގޮސްފައެވެ.
