"ސަރުކާރުން ކުރާ ގޯސްކަންކަމުގެ ޒިންމާ ރައީސް ނަޝީދުގެ ބޮލުގައި އެޅުވުމަށް އިމްރާންގެ ހައިސިއްޔަތެއް ނެތް"
ސަރުކާރުން ކުރާ ގޯސް ކަންކަމުގެ ޒިންމާ ، ރައްޔިތުންގެ މަޖިލީހުގެ ރައީސް ، ރައީސް ނަޝީދުގެ އިސްތަށިފުޅުގައި އެޅުވުމަށް ހޯމް މިނިސްޓަރ އިމްރާން އަބުދުﷲގެ ހައިސިއްޔަތެއް ނެތްކަމަށް ދޭހަވާ ގޮތަށް ޝައިޚް ޢަބުދުﷲ ސައުދާން ވާހަކަފުޅު ދައްކަވައިފިއެވެ.
ޝައިޚް ސަޢުދާން ކުރެއްވި ޓްވީޓެއްގައި ވިދާޅުވީ ސަރުކާރުން ގޯސްކަމެއް ކުރާއިރަށް ރައްޔިތުން މަޖިލީހާ އެތަނުގައި އިންނަވާ ރައީސްގެ ބޮލުގައި އަޅުވާއިރު އެމީހުން އެތަނަށް ގެންނަށް އެންމެ ކުރީ ސަފުގައި ތިއްބެވީ އަދާލަތު ޕާޓީގެ ލީޑަރު އިމްރާން އަބުދުﷲއާއި އެ މަނިކުފާނަށް ތާއީދު ކުރައްވާ މެމްބަރުން ކަމަށެވެ.
ރައްޔިތުންގެ މަޖިލީހުގެ ފުރިހަމަ އަޣްލަބިއްޔަތު އެމްޑީޕީއަށް ހޯއްދަވައި ދެއްވާނެ ކަމަށް ޝައިޚް އިމްރާން ވިދާޅުވި ބަސްފުޅެއްގެ ޚަބަރެއް ހިއްސާ ކުރައްވަމުން ސަޢުދާން ވިދާޅުވީ މަޖިލީހާއި މަޖިލީހުގެ ރައީސް ގޯސްކޮށް ވާހަކަ ދެއްކުމުގެ ހައިސިއްޔަތެއް މިއަދު ނެތް ކަމަށެވެ.
ޝައިޚް ސައުދާން މިފަދައިން ޓްވީޓް ކުރެއްވިއިރު ލާދީނީ ރިޕޯޓް ނެރުނު އުތެމައާއި އެމްޑީއެންގެ މެމްބަރުންނަށް ފިޔަވަޅު ނޭޅި އެ ޖަމްޢިއްޔާތަކުގެ އިސްވެރިން ދައުލަތުގެ ތިންބާރުގެ އިސް މަގާމުތަކުގައި ތިއްބެވުމުގެ ކަންބޮޑުވުން ، ދީނީ ޢިލްމުވެރީން ދަނީ ފާޅު ކުރައްވަމުންނެވެ. އަދި ސަރުކާރަށް ތާޢީދު ކުރައްވާ ޢަދާލަތު ޕާޓީއަށް ނިސްބަތްވާ ޢިލްމުވެރީންގެ ނަޒަރުގައި އެފަދަ ކަންކަމަށް ފިޔަވަޅު ނޭޅެނީ ރައްޔިތުންގެ މަޖިލީހުގެ ސަބަބުން ކަމަށް އެނގިފައި ވެއެވެ.
Ads by STO
