ޢުމްރާއަށް މީހުން ގެންދިޔުމުގެ ހުއްދަ ދީފައިވާ ކުންފުނިތަކަށް އެ ފުރުޞަތު އެބައޮތް- މިނިސްޓްރީ
ދިވެހި ކުންފުނިތަކަށް ވެސް މިހާރު އުމްރާ އަށް މީހުން ގެންދިއުމުގެ ފުރުސަތު އެބައޮތް ކަމުގައި އިސްލާމިކް މިނިސްޓްރީއިން ވިދާޅުވެއްޖެއެވެ.
އިސްލާމިކް މިނިސްޓްރީ އިން މި ފުރުސަތު ދިވެހި ކުންފުނިތަކަށް ހުޅުވާލާފައި މިވަނީ ދުނިޔޭގެ އެކި ކަންކޮޅުތަކުން އުމްރާގެ އަޅުކަން ކުރަން ބޭނުންވާ ފަރާތްތަކަށް އެ ފުރުސަތު ސައުދީން ހުޅުވާލުމާ ގުޅިގެންނެވެ. ސައުދީއިން ބޭރު ގައުމުތަކުގެ މީހުންނަށް އުމްރާގެ އަޅުކަން ހުޅުވާލާފައި ވަނީ މިދިޔަ ނޮވެންބަރު މަހުގެ ތެރޭގައެވެ.
"ޕީއެސްއެމް ނިއުސް" އަށް ދިން އިންޓަވިއުއެއްގައި އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީ ވިދާޅުވީ ކޮވިޑް-19 އާ ގުޅިގެން އުމްރާއަށް މީހުން ގެންދިއުމަށް ހުޅުވާލާފައިވާ ފުރުސަތުގައި ރާއްޖެއަށް ރަސްމީކޮށް އެހުއްދަ ނުލިބޭ ކަމަށާއި ނަމަވެސް ފޮރިން މިނިސްޓްރީއާ ގުޅިގެން އެކަމުގެ މަޢުލޫމާތުތައް ސާފުކުރަމުން އަންނަ ކަމަށެވެ.
އަދި ރާއްޖެއިން ޢުމުރާއަށް މީހުން ގެންދިއުމަށް ހުއްދަ ދީފައިވާ ކުންފުނިތަކުގެ ހުއްދައިގެ މުއްދަތު މިއަހަރު ތެރޭގައި އިތުރުކޮށް އިތުރު ކުންފުނިތަކަށް ވެސް ހުއްދަ ދީފައިވާނެ ކަމަށް ވެސް މިނިސްޓަރު ވިދާޅުވިއެވެ.
އުމްރާއަށް ހުޅުވާލުމުގެ ތިންވަނަ ފިޔަވަހީގެ ދަށުން އާންމުކޮށް އުމްރާއަށް ދިނުމުގެ ފުރުސަތު ހުޅުވާލާފައިވީ ނަމަވެސް އުމްރާ ވުމަށް ސައުދީއަށް ދެވޭނީ އެގައުމުގެ ސަރުކާރުން ކަނޑައަޅާ ވަކި ގައުމުތަކެއްްގެ މީހުންނަށެވެ.
