އުތީމު ގަނޑުވަރު ދިވެހިންނަށް ހުޅުވާލަނީ
ރާއްޖޭގައި ވެސް ކޮވިޑް-19 ފެތުރުމާ ގުޅިގެން އަށް މަސް ދުވަސް ވަންދެން ބަންދުކުރި ހއ. އުތީމު ގަނޑުވަރު ހަމަ އެކަނި ދިވެހިންނަށް ޒިޔާރަތް ކުރެވޭ ގޮތަށް އަލުން ހުޅުވާލަން ތައްޔާރު ވެއްޖެއެވެ.
ކޮވިޑް-19އާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން އުތީމު ގަނޑުވަރު އާއްމުންނަށް ބަންދުކުރީ މިއަހަރުގެ މާރޗް މަހުގެ 19 ވަނަ ދުވަހުގައެވެ. ނަމަވެސް މިހިނގާ ޑިސެމްބަރު މަހުގެ 13 ވާ އާދިއްތަ ދުވަހު އަލުން އެގަނޑުވަރުގެ ހިދުމަތް ފަށާގޮތަށް ހަމަޖެހިފައިވާ ކަމަށް ސަގާފީ ތަރިކަ ރައްކާތެރިކުރާ ގައުމީ މަރުކަޒުން ވަނީ ބުނެފައެވެ.
އެމަރުކަޒުން ބުނެފައި ވަނީ އުތީމު ގަނޑުވަރު ހުޅުވިފައި ހުންނާނީ ހުކުރު ދުވަސް ފިޔަވާ ކޮންމެ ދުވަހެއްގެ ހެނދުނު 08:30 ން މެންދުރުފަހު 13:30 އަށް ކަމަށެވެ. އެވަގުތުތަކުގައި، ކަނޑައެޅިފައިވާ އުސޫލުގެ ދަށުން ގަނޑުވަރު ދެއްކުން ކުރިއަށްދާނެ ކަމަށާއި ގަނޑުވަރަށް ޒިޔާރަތް ކުރައްވާ ފަރާތްތަކަށް ގަނޑުވަރަށް ވަދެވޭނީ އެމަރުކަޒުން ކަނޑައަޅާފައިވާ އުސޫލުގެ ދަށުން ނަންނޯޓް ކޮށްގެން ކަމަށް ވެސް ތަރިކަ ރައްކާތެރިކުރާ ގައުމީ މަރުކަޒުން ބުނެއެވެ.
މީގެއިތުރުން އެމަރުކަޒުން ބުނެފައި ވަނީ އަށް މަސް ފަހުން އުތީމު ގަނޑުވަރު ހުޅުވޭއިރު، ގަނޑުވަރަށް ވަނުމުގެ ހުއްދަ ހަމައެކަނި ދިވެހިންނަށް ދޭން ނިންމި ކަމުގައި ވިޔަސް، ބިދޭސީންގެ ތެރެއިން ރާއްޖޭގައި ވަޒަންވެރިވެގެން ދިރިއުޅޭ ބިދޭސީންނަށާއި، ވާކް ޕާމިޓް އޮތް ބިދޭސީންނަށް ވެސް އެފުރުސަތު ލިބިގެންދާނެ ކަމަށެވެ.
