އިކުއެޓޯރިއަލް ހޮސްޕިޓަލުގައި އުނަގަނޑު ބަދަލު ކުރުމުގެ އޮޕަރޭޝަނެއް ފުރަތަމަ ފަހަރަށް ކޮށްފި
އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) ގައި އުނަގަނޑު ބަދަލުކުރުމުގެ އޮޕަރޭޝަނެއް ފުރަތަމަ ފަހަރަށް ކޮށްފިއެވެ.
މިއޮޕަރޭޝަން ކޮށްފައި ވަނީ މި މަހުގެ ހަވަނަ ދުވަހު ކަމަށް އެހޮސްޕިޓަލުން މައުލޫމާތު ދީފައިވެއެވެ. އަދި މިއޮޕަރޭޝަން ވަރަށް ކާމިޔާބު ކަމަށާއި ބަލި މީހާގެ ހާލު ވެސް ރަނގަޅު ކަމަށް އޭއީއެޗުން ބުނެއެވެ.
އިކުއެޓޯރިއަލް ހޮސްޕިޓަލަކީ ޓާޝަރީ ފެންވަރަށް ހަދާފައިވާ ހޮސްޕިޓަލަކަށް ވާއިރު، އެ ހޮސްޕިޓަލުން ދެމުންދާ ހިދުމަތްތަކުގެ ތެރޭގައި އެކްސްރޭ، އޯޕީޑީ، ލެބޯރަޓްރީ އަދި ފިޒިއޮތެރަޕީގެ ހިދުމަތް ހިމެނެއެވެ.އަދި ކާޑިއޯ، ޑެންޓަލް، ޔޫރޮލޮޖީ، ރެސްޕިރެޓަރީ، ރީޕްރޮޑަކްޓިވް ހެލްތު އަދި އެކި ކަހަލަ ތެރަޕީތައް ދިނުމާއި، އަދި ބޮޑެތި ބަލިތަކަށް ތަހުލީލު ކުރުމާއި ބޮޑެތި އޮޕަރޭޝަންތައް ވެސް މިހާރު ކުރެވެއެވެ. އަދި އަންނަ އަހަރު އިތުރު ހިދުމަތްތައް ތައާރަފް ކުރުމަށް ވެސް އަންނަނީ މަސައްކަތް ކުރަމުންނެވެ.
