ރުޤްޔާ ކުރުމުގެ ނަމުގައި އަނިޔާކޮށް ރޭޕްކުރި މީހާ ޝަރީޢަތް ނިމެންދެން ބަންދު ކޮށްފި
މެދު ރާއްޖެ ތެރޭގެ ރަށެއްގައި އަންހެނަކަށާއި އޭނާގެ ތިން ދަރިންނަށް ރުގްޔާގެ ނަމުގައި އަނިޔާކޮށް، ޖިންސީ ގޯނާކުރި މައްސަލައާ ގުޅިގެން ހައްޔަރު ކުރި ދެވަނަ މީހާ، ޝަރީއަތް ނިމެންދެން ބަންދު ކޮށްފިއެވެ.
ފުލުހުން ބުނެފައި ވަނީ، މިމައްސަލައިގައި މިދިޔަ ނޮވެމްބަރު މަހުގެ 25 ވަނަ ދުވަހުގެ 22:30 ގައި އުމުރުން 39 އަހަރުގެ މީހަކު ހައްޔަރު ކުރިއިރު އުމުރުން 24 އަހަރުގެ މީހަކު އޭގެ އަނެއް ދުވަހު ހެނދުނު 9:51 ގައި ހައްޔަރު ކުރި ކަމަށެވެ.
މިމައްސަލައިގައި ހައްޔަރުކުރި އުމުރުން 39 އަހަރުގެ މީހާ ޝަރީޢަތް ނިމެންދެން ބަންދު ކޮށްފައިވާއިރު، 24 އަހަރުގެ މީހާ އަށް ބަންދުގެ މުއްދަތު އިތުރު ކުރުމަށް އިއްޔެ ކޯޓަށް ހާޒިރު ކުރުމުން، ޝަރީޢަތް ނިމެންދެން ބަންދުގައި ބަހައްޓަން އަމުރު ކޮށްފައިވާ ކަަމަށް ވެސް ފުލުހުން މައުލޫމާތު ދީފައިވެއެވެ.
މިފަދަ މައްސަލަތަކަކީ ސީރިއަސް މައްސަލަތައް ކަމަށާއި، މިފަދަ ކަންކަމަށް ރައްޔިތުން ސަމާލުވެ ތިބުމަށް ފުލުހުން ވަނީ އިލްތިމާސް ކުރައްވާފައެވެ.
މިމައްސަލައިގައި އަނިޔާ ލިބުނު އަންހެންމީހާއާއި އޭނާގެ ތިން ދަރިން އެގޭގައި ތިން މަސް ދުވަސް ވަންދެން ރަޙީނު ކޮށްގެން ގެންގުޅުނު ކަމަށް އެމީހުން ބުނެފައި ވެއެވެ. އެމީހުން ރަހީނު ކޮށްގެން ގެންގުޅެ، ތަފާތު އެކި އަނިޔާތައް ދިނުމުގެ އިތުރުން، އަންހެން މީހާގެ އުމުރުން 7 އަހަރުގެ ކުޑަ އަންހެން ދަރިއަށް ވެސް ޖިންސީ ގޯނާ ކުރި ކަމަށް އެމީހުން މައްސަލަ ހުށަހެޅިއިރު ބުނެފައިވެއެވެ.
