ފުރަން ގޮސް ހުއްޓާ ނިހާންގެ ޕާސްޕޯޓު ހިފަހައްޓައިފި!
ވިލިމާލެ ދާއިރާގެ ކުރީގެ މެންބަރު އަހުމަދު ނިހާން ޙުސެއިން މަނިކު ފުރަން އެއާޕޯޓަށް ވަޑައިގެން ހުންނަވަނިކޮށް، ފުރުން ހުއްޓުވާ އޭނާގެ ޕާސްޕޯޓު ހިފަހައްޓައިފިއެވެ،
ފުލުހުން ވިދާޅުވެފައި ވަނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ޚިޔާނާތުގެ މައްސަލައާ ގުޅިގެން، ނިހާނަށް ރާއްޖެއިން ބޭރަށް ފުރުން މަނާ ކޮށްފައިވާނެ ކަމަށެވެ.
އޮންލައިން ނޫސް "ދަ ޕްރެސް" އިން ބުނެފައި ވަނީ ނިހާންގެ ޕާސްޕޯޓު ހިފަހައްޓާފައިވަނީ ދުބާއީ އަށް ފުރަން އިއްޔެ އޭނާ އެއާޕޯޓަށް ގޮސް ހުއްޓާ ކަމަށް އެނޫހަށް އެނގިފައިވާ ކަމަށެވެ. ނަމަވެސް މިކަމާ ގުޅޭގޮތުން ނިހާންގެ ބަހެއް އަދި ވަނީ ލިބޭގޮތް ނުވެފައެވެ.
މިކަމާ ގުޅޭގޮތުން ފުލުހުން ވެސް އިތުރު އެއްޗެއް ވިދާޅުވެފައެއް ނުވެއެވެ.
ނަމަވެސް އެމްއެމްޕީއާރްސީގެ މައްސަލައާ ގުޅިގެން ތަހުގީގަށް ނިހާން ވަނީ މިއަހަރުގެ އޮކްޓޯބަރު މަހު ދެ ފަހަަރެއް މަތިން އެސެޓް ރިކަވަރީ ކޮމިޝަނަށް ހާޒިރު ކޮށްފައެވެ. މީގެ އިތުރު ތަފްސީލެއް އެކޮމިޝަނުން ވެސް ހާމަ ކޮށްފައެއް ނުވެއެވެ.
މިމައްސަލައިގެ ތަހުގީގަށް ނިހާންގެ އިތުރުން ކުރީގެ ނައިބު ރައީސް އަހުމަދު އަދީބު ވެސް މީގެ ކުރިން ވަނީ އެކޮމިޝަނަށް ހާޒިރު ކޮށްފައެވެ. ދައުލަތުން އެމަނިކުފާނުގެ މައްޗަށް އުފުލާފައިވާ ދައުވާތަކާ ގުޅިގެން އަދީބު މިހާރު ގެންދަވަނީ 20 އަހަރު ދުވަހުގެ ޖަލު ހުކުމެއް ގޭގައި ތަންފީޒު ކުރައްވަމުންނެވެ.
Ads by STO
