ބީއެމްއެލްގެ ބާޒާރު އަދި އެއާޕޯޓު ބްރާންޗް ބަންދު ކުރަނީ
ބޭންކް އޮފް މޯލްޑިވްސް (ބީއެމްއެލް)ގެ އެއާޕޯޓު ބްރާންޗާއި ބާޒާރު ބްރާންޗު ބަންދު ކުރުމަށް އެ ކުންފުނިން ނިންމައިފިއެވެ.
އޮންލައިން ނޫހަކަށް މައުލޫމަތު ދެއްވަމުން އެބޭންކުގެ ޕަބްލިކް ރިލޭޝަންސް އޮފިސަރ ވިދާޅުވީ ބީއެމްއެލް ގެ އެއާޕޯޓް ބްރާންޗާއި ބާޒާރު ބްރާންޗް މިމަހުގެ 22 އިން ފެށިގެން ބަންދު ކުރަން ނިންމާފައިވާ ކަމަށެވެ.
ބީއެމްއެލް އިން ބުނެފައިވާ ގޮތުގައި މި ނިންމުމަކީ ކޮވިޑް 19އާ ގުޅިގެން ބީއެމްއެލްގެ ހިދުމަތްތައް ދިނުމުގައި ގެނެސްފައިވާ ބަދަލުތަކާ ގުޅިގެން ނިންމި ނިންމުމެކެވެ.
އޮންލައިންކޮށް ކުރިން ނުލިބޭ ގިނަ ހިދުމަތްތަކެއް މިހާރު އޮންލައިން ކޮށް ހޯދޭނެކަމާއި ބީއެމްއެލްގެ އެކި ހިދުމަތްތައް ދިނުމަށް ވަކި ހާއްސަ ސާވިސް ސެންޓަރުތަކާއި، ކަސްޓަމާ ސާވިސް ސެންޓަރެއް ގާއިމު ކޮށްފައި ވުމުން، ބީއެމްއެލް ބްރާންޗުތަކުން ދެމުން އަންނަ ގިނަ ހިދުމަތްތައް މި ސެންޓަރު ތަކަށް ބަދަލު ކުރެވިފައިވާކަމަށް އެ ބޭންކުން ފާހަގަ ކޮށްފައިވެއެވެ. އަދި ގިނަ ޚިދުމަތްތަކެއް އޭޓީއެމް މެދުވެރިކޮށް ވެސް ލިބޭނެ ކަމަށް ބީއެމްއެލް އިން ވަނީ ބުނެފައެވެ.
ބީއެމްއެލްއިން ބުނެފައި ވަނީ އެއާޕޯޓުގައި ހުންނަ ބީއެމްއެލް ބްރާންޗާއި ބާޒާރުގައި ހުންނަ ބްރާންޗް ބަންދު ކުރިކަމުގައި ވިޔަސް، އެ ދެ ބްރާންޗުގައި ހުންނަ އޭޓީއެމް ތަކުން ހިދުމަތް ދިނުން ހުއްޓާ ނުލާނެ ކަމަށެވެ.
