އަންނަ އަހަރުގެ ފުރަތަމަ ކުއަރޓަރގައި ރާއްޖެއަށް ވެކްސިން ލިބޭނެ ކަމަށް ލަފާ ކުރެވޭ: ޑރ ޝާހު
2021 ވަނަ އަހަރުގެ ފުރަތަމަ ކުއަރޓަރގައި ރާއްޖެއަށް ވެކްސިން ލިބޭނެ ކަމަށް ލަފާ ކުރާ ކަމަށް ހެލްތު މިނިސްޓްރީގެ ޗެއަރޕަރސަން އޮފް ސްޓިއަރިންގް ކޮމިޓީ ފޯރ ކޮވިޑް ވެކްސިން، ޑރ. ޝާހު އަބްދުﷲ މާހިރު ލަފާ ކުރައްވައިފިއެވެ.
ޑރ.ޝާހު މިހެން ވިދާޅުވެފައި ވަނީ ރާއްޖެޓީވީގެ 'ހަބަރުފީތާ' ޕްރޮގްރާމްގައި ވާހަކަފުޅު ދައްކަވަމުންނެވެ. އަންނަ އަހަރުގެ ފުރަތަމަ ކުއަރޓަރގައި ވެކްސިން ލިބޭނެ ކަމަށް ލަފާ ކުރިޔަސް ދުނިޔޭގެ އެކި ކަންކޮޅުތަކުން ވެކްސިން ހޯދުމުގެ މަސައްްކަތް ކުރުމާއެކު އެކި ގައުމުތަކަށް ހަމަހަމަ ކަމާއެކު ފޯރުކޮށްދިނުމުގެ މަސަައްކަތް ކުރަމުން ދާ ކަމަށް ޝާހު ވިދާޅުވިއެވެ.
ރާއްޖެއަށް ވެކްސިން ލިބެނީ ދުނިޔޭގެ ހުރިހާ ގައުމަކަށް ހަމަހަމަކަމާއެކު ވެކްސިން ފޯރުކޮށްދިނުމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކުރިއަށްގެންދާ "ކޮވެކްސް" ޕްރޮގްރާމްގެ ދަށުންނެވެ.
"މިއަންނަ އަހަރު ގެ ފުރަތަމަ ކުއަރޓަރގައި އަޅުގަނޑުމެން މި އެކްސްޕެކްޓް ކުރަނީ ރާއްޖެއަށް ވެކްސިންއެއް ލިބެން. ދެން އަޅުގަނޑުމެން އެހެން އެކްސްޕެކްޓް ކުރިޔަސް ވެސް ދުނިޔެއަށް މިއަންނަ ޑިމާންޑާއި، އެކި ގައުމުތަކަށް ވަރަށް ހަމަހަމަކޮށް ފޯރުކޮށްދިނުމުގެ މަސައްކަތް ކުރަމުން އެބަ ގެންދޭ" ޝާހު ވިދާޅުވިއެވެ.
މިހާރު ވަމުންދާ ތައްޔާރީތަކާ ގުޅިގެން ވާހަކަދައްކަވަމުން ޑރ. ޝާހު ވިދާޅުވީ ބާރު ދުވެލީގައި ތައްޔާރީތައް ވަމުން އަންނަ ކަމަށާއި ރާއްޖެއަށް ވެކްސިން ލިބޭ ދުވަހު ވެކްސިން ޖެހުމުގެ މަސައްކަތް ވެސް ފެށިގެންދާނެ ކަމަށެވެ. ޝާހު އިތުރަށް ވިދާޅުވީ ވެކްސިން ލިބޭނެކަމަށް ކަނޑައަޅާފައިވާ ޓާގެޓަށް ލިބޭނެ ކަމުގެ އުންމީދު ކުރާ ކަމަށެވެ.
"އެހެންވީމާ އަޅުގަނޑުމެން ވެސް ކޯވެކްސް ފެސިލިޓީ، ގްލޯބަލް ޕާޓްނަރޝިޕްގެ ތެރެއިން އަޅުގަނޑުމެންނަށް ވެސް ވެކްސިން ލިބޭނީ. އެހެންވީމަ އަޅުގަނޑުމެންނަށް އެ ޓާގެޓަށް އިރާދަކުރެއްވިއްޔާ ލިބޭނެ ކަމުގެ އުއްމީދުތައް އެބައޮތް" ޝާހު ވިދާޅުވެފައި ވެއެވެ.
